ઘરે જ બનાવો રેસ્ટોરાં સ્ટાઇલ એગલેસ ચોકલેટ વોલનટ બ્રાઉની, નોંધી લો સરળ રેસીપી

બાળકોથી લઈને યુવાનો સુધી દરેકની ઓલ-ટાઇમ ફેવરીટ એવી ચોકલેટ ખાવાની ક્રેઝ ગમે ત્યારે જોવા મળે છે. જ્યારે પણ મીઠું કે ચોકલેટીયન ખાવાનું મન થાય ત્યારે તમે ઘરે જ એકદમ હેલ્ધી અને ટેસ્ટી એગલેસ ચોકલેટ વોલનટ બ્રાઉની બનાવીને પરિવાર કે મિત્રોને સરપ્રાઈઝ આપી શકો છો. આ રેસીપી ગમે ત્યારે અને કોઈપણ પ્રસંગે સરળતાથી બનાવી શકાય છે. સામાન્ય રીતે બજારમાં મળતી કેક કે બ્રાઉનીમાં ઈંડાનો ઉપયોગ થતો હોવાથી શાકાહારી પરિવારો તે ખાવાનું ટાળતા હોય છે. પરંતુ હવે તમારે મૂંઝાવવાની જરૂર નથી, કારણ કે આજે અમે તમારા માટે લાવ્યા છીએ એકદમ સોફ્ટ અને સ્વાદિષ્ટ એગલેસ ચોકલેટ વોલનટ બ્રાઉની બનાવવાની પરફેક્ટ અને આસાન રીત.

• જરૂરી સામગ્રી

ડાર્ક ચોકલેટના ટુકડા: 170 ગ્રામ (અથવા આશરે 1.5 કપ)
માખણ : 113 ગ્રામ (અથવા અડધો કપ)
ખાંડ: 320 ગ્રામ (અથવા 1.5 કપ, સ્વાદ મુજબ)
દહીં: 245 ગ્રામ (અથવા 1 કપ – ઈંડાના વિકલ્પ તરીકે)
કોકો પાવડર: 22 ગ્રામ (3 મોટી ચમચી)
મેંદો: 125 ગ્રામ (1 કપ)
બેકિંગ પાવડર: 1 ચમચી
અખરોટ: મુઠ્ઠીભર (બારીક સમારેલા)
વેનીલા એસેન્સ: 2 ચમચી
અન્ય સામગ્રી: બટર પેપર અને કેક ટીન

• બનાવવાની રીત

સૌપ્રથમ એક સોસપેન અથવા ડબલ બોઈલર પદ્ધતિનો ઉપયોગ કરીને ડાર્ક ચોકલેટના ટુકડા અને માખણને ધીમી આંચ પર સાથે ઓગાળી લો. જ્યારે ચોકલેટ અને માખણ એકરસ થઈ જાય ત્યારે તેને ગેસ પરથી નીચે ઉતારી લો. હવે આ હૂંફાળા મિશ્રણમાં ખાંડ ઉમેરો અને તેને સારી રીતે હલાવીને મિક્સ કરો. જો તમે એગલેસ (શાકાહારી) બ્રાઉની બનાવી રહ્યા છો, તો ઈંડાના સ્થાન પર આ મિશ્રણમાં એક કપ ફેંટેલું તાજું દહીં ઉમેરો. દહીં ઉમેરવાથી બ્રાઉની એકદમ સોફ્ટ અને સ્પોન્જી બનશે. હવે તેમાં વેનીલા એસેન્સ ઉમેરીને બરાબર મિક્સ કરી લો. ત્યારબાદ આ મિશ્રણમાં કોકો પાવડર, મેંદો (રિફાઇન્ડ લોટ), બારીક સમારેલા અખરોટ અને બેકિંગ પાવડર ઉમેરો. આ તમામ સામગ્રીને હળવા હાથે સરખી રીતે મિક્સ કરો જેથી મિશ્રણમાં કોઈ ગઠ્ઠા ન રહે. હવે એક કેક ટીનને બટર પેપરથી બરાબર લાઇન કરી લો (જેથી બ્રાઉની નીચે ચોંટે નહીં). તૈયાર થયેલું ચોકલેટનું મિશ્રણ આ ટીનમાં રેડી દો. ટીનને હળવેથી ટેપ કરો જેથી અંદર રહેલા હવાના પરપોટા નીકળી જાય.

• બેક કરવાની રીત

જો ઓવન હોય તો: ઓવનને 180°C તાપમાન પર પ્રીહિટ કરી લો અને બ્રાઉનીને આ લગભગ 30 મિનિટ માટે બેક થવા દો.
જો ઓવન ન હોય તો: ચિંતા કરવાની જરૂર નથી! એક જાડા તળિયાવાળી કડાઈમાં મીઠું અથવા સ્ટેન્ડ મૂકીને તેને ઢાંકી દો અને ધીમી આંચ પર 35 થી 40 મિનિટ સુધી બેક કરો.

બ્રાઉની તૈયાર થઈ ગયા બાદ તેને ઠંડી થવા દો અને તમારા મનપસંદ આકારમાં કાપીને સર્વ કરો. આ ટેસ્ટી અને ચોકલેટીયન નાસ્તાની મજા સૌ કોઈ ચોક્કસ માણશે!