નવી દિલ્હી, 20 ઓગસ્ટ 2026: કેન્દ્રીય મંત્રીમંડળે આજે પાંચ પ્રોજેક્ટ્સને મંજૂરી આપી છે, જેમાં ચાર રેલવે પ્રોજેક્ટ્સ અને એક હાઈવે પ્રોજેક્ટનો સમાવેશ થાય છે. નવી દિલ્હીમાં મંત્રીમંડળની બેઠક બાદ મીડિયાને માહિતી આપતા માહિતી અને પ્રસારણ મંત્રી અશ્વિની વૈષ્ણવે જણાવ્યું હતું કે, વડાપ્રધાન નરેન્દ્ર મોદીના નેતૃત્વમાં કેન્દ્રીય મંત્રીમંડળે આજે 13,041કરોડના મૂલ્યના આ પ્રોજેક્ટ્સને મંજૂરી આપી છે.
વૈષ્ણવે જણાવ્યું હતું કે રેલવેના ચાર મલ્ટી-ટ્રેકિંગ પ્રોજેક્ટ્સ પશ્ચિમ બંગાળ, ઓડિશા, તમિલનાડુ અને આંધ્રપ્રદેશના આઠ જિલ્લાઓને સેવા નેટવર્ક હેઠળ આવરી લેશે. આ પ્રોજેક્ટ્સમાં ખડગપુર-ભદ્રક ચોથી લાઇન, ભદ્રક-હરિદાસપુર ચોથી લાઇન, ગુમ્મિડીપુંડી-ગુડુર ત્રીજી અને ચોથી લાઇન તથા કટક-પારાદીપ ત્રીજી અને ચોથી લાઇનનો સમાવેશ થાય છે. આનાથી ભારતીય રેલવેના નેટવર્કમાં આશરે 410 કિલોમીટરનો ઉમેરો થશે. વૈષ્ણવે ઉલ્લેખ કર્યો હતો કે આ પ્રોજેક્ટ્સનો અંદાજિત ખર્ચ 9,450 કરોડ છે અને તેને પૂર્ણ કરવાની લક્ષિત તારીખ 2030-31 છે.
વૈષ્ણવે જણાવ્યું હતું કે રેલવે લાઇનના વિસ્તરણથી જોડાણમાં નોંધપાત્ર સુધારો થશે. તેનાથી ભારતીય રેલવેની કાર્યકારી કાર્યક્ષમતા અને સેવાની વિશ્વસનીયતામાં પણ વધારો થશે. સૂચિત મલ્ટી-ટ્રેકિંગ પ્રોજેક્ટ્સ લગભગ 6,448 ગામો સુધીની પહોંચ સુધારશે, જેની સંયુક્ત વસ્તી આશરે 60 લાખ છે.
ક્ષમતામાં સૂચિત વધારાથી દેશભરના અનેક મુખ્ય પ્રવાસન સ્થળો સુધીની રેલવે કનેક્ટિવિટીમાં સુધારો થશે. આ સ્થળોમાં કુલડીહા વન્યજીવ અભયારણ્ય, ભીતરકનિકા રાષ્ટ્રીય ઉદ્યાન, મા ભદ્રકાલી મંદિર, મા ધામરાઈ મંદિર, પંચલિંગેશ્વર મંદિર, પુલિકટ સરોવર, નેલાપટ્ટુ પક્ષી અભયારણ્ય, ભગવાન વીરરાઘવ પેરુમલ મંદિર, ધબલેશ્વર મંદિર અને લલિતગિરીના બૌદ્ધ સ્થળનો સમાવેશ થાય છે. આ પ્રોજેક્ટ્સ કોલસો, લોખંડની કાચી ધાતુ, સિમેન્ટ, લોખંડ અને સ્ટીલ, કન્ટેનર, વાહનો અને અનાજ જેવી ચીજવસ્તુઓના પરિવહન માટે મહત્વપૂર્ણ માર્ગો પૂરા પાડે છે.
વૈષ્ણવે જણાવ્યું હતું કે કેન્દ્રીય મંત્રીમંડળે બિહારમાં રાષ્ટ્રીય ધોરીમાર્ગ-22ના મુઝફ્ફરપુર-સીતામઢી-સોનબરસા વિભાગને ચાર-લેન ધોરીમાર્ગના ધોરણમાં અપગ્રેડ કરવાની મંજૂરી આપી છે. તેમણે કહ્યું કે 82.57 કિલોમીટર લાંબા આ પ્રોજેક્ટનો વિકાસ 3,590 કરોડથી વધુના કુલ મૂડી ખર્ચે કરવામાં આવશે.
વધુ વાંચો: બ્રિટનમાં વિમાન દુર્ઘટનામાં ભારતીય મૂળના દંપતીનું મોત
