નવી દિલ્હી, 1 સપ્ટેમ્બર 2026: સરકારી બજારમાં ખાંડની પૂરતી ઉપલબ્ધતા સુનિશ્ચિત કરવા અને ખાંડની સંગ્રહખોરી તથા સટ્ટાકીય વેપારને રોકવા માટે ભારત સરકારે 15મી સપ્ટેમ્બર, 2026 થી 30મી નવેમ્બર, 2026 સુધી અમલી બને તે રીતે ખાંડના વેપારીઓ માટે સ્ટોક હોલ્ડિંગ મર્યાદા 4,000 ક્વિન્ટલથી ઘટાડીને 2,000 ક્વિન્ટલ કરી છે. વર્તમાન સમયમાં, દેશભરમાં ખાંડના વેપારીઓ પર 4,000 ક્વિન્ટલની સ્ટોક હોલ્ડિંગ મર્યાદા 1લી ઓગસ્ટ, 2026 થી અમલમાં છે. સરકારે હવે સ્ટોક હોલ્ડિંગ મર્યાદા ઘટાડીને 2,000 ક્વિન્ટલ કરીને વધુ પગલાં લીધાં છે.
સુધારેલી જોગવાઈઓ હેઠળ, 15મી સપ્ટેમ્બર, 2026 થી અમલી બને તે રીતે, ખાંડના વેપારીએ: આવો સ્ટોક મળ્યાની તારીખથી 30 દિવસથી વધુ સમયગાળા માટે કોઈ સ્ટોક રાખવો નહીં. દેશભરમાં કોઈપણ સમયે અને કોઈપણ સ્થળે 2,000 ક્વિન્ટલથી વધુ ખાંડ સ્ટોકમાં રાખવી નહીં. જો કે, પ્રદેશની વિશિષ્ટ બજાર જરૂરિયાતોને ધ્યાનમાં રાખીને, કોલકાતા અને તેના વિસ્તૃત મેટ્રોપોલિટન વિસ્તારો માટે સ્ટોક હોલ્ડિંગ મર્યાદા 4,000 ક્વિન્ટલ રહેશે.
કોલકાતા પ્રદેશ ઉત્તર પ્રદેશ અને મહારાષ્ટ્રમાંથી ખાંડ મેળવે છે અને ઉત્તર-પૂર્વીય પ્રદેશ સહિત દેશના પૂર્વ ભાગમાં સપ્લાય કરે છે. તેથી, કોલકાતા અને તેના વિસ્તૃત મેટ્રોપોલિટન વિસ્તારો માટે 4,000 ક્વિન્ટલની પ્રવર્તમાન મર્યાદા જાળવી રાખવામાં આવી છે. આ પગલાંનો ઉદ્દેશ્ય સંગ્રહખોરીને વધુ અટકાવવાનો, સટ્ટાકીય વેપારને નિરુત્સાહિત કરવાનો અને ખાંડના સ્ટોકના અતિશય સંચયને રોકવાનો છે. તે સપ્લાય ચેઇન દ્વારા ખાંડની વ્યવસ્થિત અવરજવરને સુગમ બનાવશે અને ગ્રાહકોને વાજબી ભાવે તેની સતત ઉપલબ્ધતા સુનિશ્ચિત કરશે.
