નવી દિલ્હી, 3 સપ્ટેમ્બર 2026: ભારત અને અમેરિકા વચ્ચેના દ્વિપક્ષીય વેપાર કરાર (BTA) ને લઈને કેન્દ્રીય વાણિજ્ય અને ઉદ્યોગ મંત્રી પીયુષ ગોયલે ભારતનું વલણ અત્યંત સ્પષ્ટ કરી દીધું છે. તેમણે એક કાર્યક્રમમાં જણાવ્યું છે કે, આ વેપાર કરારને આખરી ઓપ ત્યારે જ આપવામાં આવશે, જ્યારે અમેરિકા ભારતને તેના મુખ્ય વૈશ્વિક સ્પર્ધક દેશો જેવા કે વિયતનામ, બાંગ્લાદેશ અને ચીન કરતાં વધુ સારા અને રાહતદાયક ટેરિફના લાભો પૂરા પાડશે.
ફ્રી ટ્રેડ એગ્રીમેન્ટ (મુક્ત વેપાર કરાર) સાથે જોડાયેલા એક વિશેષ કાર્યક્રમને સંબોધતા મંત્રી પીયુષ ગોયલે જણાવ્યું હતું કે, “જેવી જ યુએસ સરકાર આપણા સ્પર્ધક દેશોની સરખામણીમાં આપણને પ્રાથમિકતા આપતી ટેરિફ દર આપવામાં સક્ષમ બનશે, તેવી જ ત્વરાથી આપણે BTA ને આખરી સ્વરૂપ આપીને તેની વિગતો જાહેર કરીશું.”
મંત્રીએ ભારપૂર્વક જણાવ્યું હતું કે, ભારતે અત્યાર સુધી જે પણ ફ્રી ટ્રેડ એગ્રીમેન્ટ્સ (FTA) ને અંતિમ સ્વરૂપ આપ્યું છે, તેનાથી દેશના ઘરેલુ વેપારીઓ અને ઉત્પાદકો માટે વૈશ્વિક સ્તરે નિકાસના મોટા દ્વાર ખુલ્યા છે. ભારત આગામી મહિનાઓ અને વર્ષોમાં વૈશ્વિક વેપારને વેગ આપવા માટે અન્ય પ્રમુખ દેશો અને આર્થિક બ્લોક્સ સાથે પણ વ્યાપારી સમજૂતીઓ કરવા જઈ રહ્યો છે.
આગામી સમયમાં કેનેડા, મેક્સિકો, ચિલી, મર્કોસુર, SACU, GCC અને ઇઝરાયેલ જેવા દેશો તથા સંગઠનો સાથે પણ વેપાર કરાર કરવામાં આવશે. ઉલ્લેખનીય છે કે, ‘મર્કોસુર’ એ દક્ષિણ અમેરિકાનું એક પ્રમુખ પ્રાદેશિક આર્થિક અને વેપાર સંગઠન છે, જ્યારે ‘SACU’ એ દક્ષિણી આફ્રિકી સીમા શુલ્ક સંઘ છે. આ ઉપરાંત, ‘GCC’ (ખાડી સહયોગ પરિષદ)માં પશ્ચિમ એશિયાના છ મહત્વપૂર્ણ દેશોનો સમાવેશ થાય છે, જેની સાથે ભારતના વેપારી સંબંધો વધુ મજબૂત બનવા જઈ રહ્યા છે.
