સાદી ખીચડીને બદલે બનાવો ટેસ્ટી પંચરત્ન મસાલા ખીચડી, જાણો રેસીપી

ખીચડીનું નામ પડતા જ મોટે ભાગે હળવા અને સાદા ખોરાકનો ખ્યાલ આવે છે. પરંતુ જો તમે ખીચડીમાં થોડા મસાલા અને અલગ-અલગ દાળોનો સ્વાદ ઉમેરી દો, તો આ જ સાદી વાનગી ખૂબ જ સ્વાદિષ્ટ અને પૌષ્ટિક બની જાય છે. ‘પંચરત્ન મસાલા ખીચડી’ એક એવી જ શાનદાર રેસિપી છે, જેમાં ચોખા સાથે પાંચ પ્રકારની દાળ અને શાકભાજીનો ઉપયોગ કરવામાં આવે છે. લંચ કે ડિનર માટે આ એક પરફેક્ટ અને હેલ્ધી વિકલ્પ છે.

• પંચરત્ન મસાલા ખીચડી માટે જરૂરી સામગ્રી

1 કપ ચોખા
2 મોટી ચમચી મગની દાળ
2 મોટી ચમચી મસૂર દાળ
2 મોટી ચમચી તુવેર દાળ
2 મોટી ચમચી ચણા દાળ
2 મોટી ચમચી અડદ દાળ
1 નાની ડુંગળી (બારીક સમારેલી)
1 ટામેટું (સમારેલું)
1 ગાજર (ઝીણી સમારેલુ)
1 નાનો બટાકો (ટુકડાઓમાં કાપેલો)
1-2 લીલા મરચાં
1 ચમચી જીરું
1/2 ચમચી હળદર
1/2 ચમચી લાલ મરચું પાવડર
1/2 ચમચી ધાણાજીરું પાવડર
1/2 ચમચી ગરમ મસાલો
1 ચપટી હિંગ
સ્વાદ અનુસાર મીઠું
1-2 મોટી ચમચી ઘી અથવા તેલ
4 થી 5 કપ પાણી
લીલા ધાણા (સજાવવા માટે)

• બનાવવાની સરળ રીત

સૌપ્રથમ ચોખા અને પાંચેય દાળને સારી રીતે ધોઈ લો. તેને એકસાથે આશરે 15 થી 20 મિનિટ માટે પાણીમાં પલાળી રાખો. ચણા અને અડદ દાળ હોવાથી પલાળવાથી તે જલ્દી રંધાઈ જશે અને ખીચડીનું ટેક્સચર સરસ આવશે. હવે પ્રેશર કુકરમાં ઘી અથવા તેલ ગરમ કરો. તેમાં જીરું અને હિંગ નાખો. જીરું તતડે એટલે લીલા મરચાં અને ઝીણી સમારેલી ડુંગળી ઉમેરીને સાંતળો. ડુંગળી સોનેરી થાય એટલે ટામેટાં, હળદર, લાલ મરચું અને ધાણાજીરું પાવડર નાખીને મસાલો બરાબર તેલ છૂટે ત્યાં સુધી પકાવો. ત્યારબાદ તેમાં સમારેલા ગાજર અને બટાકા નાખીને 1-2 મિનિટ સાંતળો. હવે પલાળેલી દાળ અને ચોખા ઉમેરીને મસાલા સાથે સારી રીતે મિક્સ કરી લો. (તમારી પસંદગી મુજબ તેમાં વટાણા, બીન્સ કે પાલક પણ ઉમેરી શકો છો.)

તેમાં 4 થી 5 કપ પાણી અને સ્વાદ અનુસાર મીઠું ઉમેરો. (જો તમને પાતળી ખીચડી ગમતી હોય તો પાણીની માત્રા વધારી શકો છો.) કુકરનું ઢાંકણુ બંધ કરીને મધ્યમ આંચ પર 3 થી 5 સીટી વગાડો. પ્રેશર જાતે જ છૂટું પડવા દો. કુકર ખોલીને ખીચડીને બરાબર મિક્સ કરી લો. અંતમાં ઉપરથી ગરમ મસાલો, લીલા ધાણા અને એક ચમચી શુદ્ધ ઘી ઉમેરો. આ સ્વાદિષ્ટ પંચરત્ન મસાલા ખીચડીને ગરમાગરમ દહીં, પાપડ, અથાણાં અથવા ગ્રીન ચટણી સાથે સર્વ કરો.