મમાલ્લાપુરમ, 06 નવેમ્બર 2026: તમિલનાડુમાં ઓલ્ડ મહાબલીપુરમ રોડ પર પય્યાનુર નજીક એક વાન પલટી ખાઈને સરકારી બસ સાથે અથડાતાં, ત્રણ મહિલા કર્મચારીઓના મોત થયાં અને અન્ય 20 લોકો ગંભીર રીતે ઘાયલ થયાં.
આ ઘટના ત્યારે બની જ્યારે એક પ્રવાસી વાન કર્મચારીઓને મહાબલીપુરમથી કેલમ્બાક્કમ સ્થિત એક કંપનીમાં લઈ જઈ રહી હતી. મહાબલીપુરમ પોલીસના જણાવ્યા અનુસાર, વાનના રસ્તામાં અચાનક એક ગાય આવી જતાં ચાલકે વાહન પરનો કાબૂ ગુમાવી દીધો હતો. વાન પલટી ગઈ અને સામેની દિશામાંથી (તિરુપોરુરથી મહાબલીપુરમ તરફ) આવી રહેલી એક સરકારી બસ સાથે અથડાઈ ગઈ.
ત્રણ મહિલાઓનું ઘટનાસ્થળે જ મોત
વાનમાં મુસાફરી કરી રહેલી ત્રણ મહિલાઓનું ઘટનાસ્થળે જ મૃત્યુ થયું હતું. ઘટનાની જાણ થતાં જ 108 એમ્બ્યુલન્સ અને પોલીસ કર્મચારીઓ ત્યાં પહોંચી ગયા હતા અને 20 ઘાયલ મહિલાઓને સારવાર માટે હોસ્પિટલ ખસેડવામાં આવી હતી. પોલીસે જણાવ્યું છે કે અકસ્માત અંગે વધુ તપાસ ચાલી રહી છે.
વધુ વાંચો: એક સ્કૂટી સવારને બચાવવા દોડી આવ્યા લોકો, પણ ટ્રેલરે 7નાં જીવ લીધા! ઝારખંડમાં ભયાનક અકસ્માત
