અમદાવાદઃ અમદાવાદ મ્યુનિ.કોર્પોરેશનના સોલિડ વેસ્ટ મેનેજમેન્ટ ખાતા દ્વારા શહેરના ઇન્ટરનેશનલ અને ડોમેસ્ટિક એરપોર્ટનો કચરો લેવાનું એક વર્ષથી બંધ કરી દેવાયું છે. અમદાવાદ મ્યુનિ. કોર્પોરેશને એરપોર્ટના સંચાલકોને પ્રોસેસ પ્લાન્ટ લગાડી કચરાનો નિકાલ કરવા આદેશ કરી દીધો છે. આ અંગે એરપોર્ટનું સંચાલન કરતી કંપનીના પ્રતિનિધિઓએ મ્યુનિ. ના અધિકારીઓને કચરો ઉપાડવા રજૂઆત કરી હતી પણ તેમણે ના પાડી દીધી હતી.
શહેરમાં છેલ્લા એક વર્ષથી કોરોનાની મહામારીના કારણે એરપોર્ટ ઉપર ફુલફ્લેજ તમામ ફ્લાઇટનું ઓપરેશન થતું નથી પણ હવે અનલોક થતા એરપોર્ટ ઉપર ટ્રાફિક સામાન્ય થઈ રહ્યો છે જેથી એરપોર્ટ સંકુલમાં પેદા થતો કચરો ઉપાડવા માટે અમદાવાદ મ્યુનિ. કોર્પોરેશનને રજૂઆત કરાઈ હતી પણ મ્યુનિએ કચરો ઉપાડવાની ના પાડી દીધી છે અને નિયમ મુજબ એરપોર્ટને પોતાનો કચરો જાતે પ્રોસેસ કરી નિકાલ કરવા આદેશ કર્યો છે.
કેન્દ્ર સરકારે 2016માં સોલિડ વેસ્ટ મેનેજમેન્ટ રૂલ્સ બનાવ્યા હતા જે અંતર્ગત દૈનિક 100 કિલોથી વધુ કચરો ઉત્પન્ન કરતા એકમોએ નિયમ મુજબ કચરાનો નિકાલ કરવાનો રહે છે અમદાવાદ મ્યુનિ.કોર્પોરેશને ડિસેમ્બર 2019માં અમદાવાદ શહેરમાં દૈનિક 100 કિલોથી વધુ કચરો પેદા કરતા એકમોને જાહેર નોટિસ આપી નિયમોનું પાલન કરવા આદેશ કર્યો હતો. અમદાવાદ મ્યુનિ.કોર્પોરેશન શહેરમાં દૈનિક 100 કિલોથી વધુ કચરો ઉત્પન્ન કરતા એકમોને પ્રોસેસ પ્લાન્ટ લગાડવાનો નિયમ અમલી બનાવ્યો હતો.
આ સંદર્ભમાં IIM, ONGC, L D એન્જિનિયરિંગ કોલેજ, સિવિલ હોસ્પિટલ સહિત અમદાવાદમાં 65 જેટલા એકમો પોતાનો કચરો પોતે પ્રોસેસ કરવાની વ્યવસ્થા કરી હતી પણ અમદાવાદ એરપોર્ટ ઉપર વ્યવસ્થા ગોઠવાઈ ન હતી. ગત માર્ચ 2020માં કોરોના મહામારીના કારણે લોકડાઉન કરાયું હતું પછી તબક્કાવાર આંશિક લોકડાઉન હતું. એક વર્ષથી અમદાવાદ મ્યુનિ. કોર્પોરેશન દ્વારા નિયમ મુજબ એરપોર્ટ સંકુલથી કચરો લેવાનું બંધ કરી દેવાયું છે. એરપોર્ટની આસપાસ મૂકવામાં આવેલી કચરાપેટીઓ ઊઠાવી લેવાઈ છે પણ એક વર્ષથી એરપોર્ટ સંકુલમાંથી કચરો ઉપડી રહ્યો નથી.
