બોલીવુડ અભિનેત્રી અને ભૂતપૂર્વ મિસ વર્લ્ડ ઐશ્વર્યા રાય બચ્ચને ફરી સાબિત કરી દીધું કે તેઓ ગ્લેમર અને ગ્રેસનું પ્રતિબિંબ છે. પેરિસ ફેશન વીકમાં તેમની ભવ્ય હાજરીએ સૌનું ધ્યાન ખેંચ્યું છે. એક પ્રતિષ્ઠિત ગ્લોબલ બ્યુટી બ્રાન્ડનું પ્રતિનિધિત્વ કરતાં તેમણે અનેક હોલિવુડ સેલિબ્રિટીઝ સાથે રેમ્પ પર વૉક કર્યું અને ચાહકોને મંત્રમુગ્ધ કરી દીધા હતા.
ઐશ્વર્યાએ બ્લેક કલરના એલિગન્ટ આઉટફિટમાં રેમ્પ પર વૉક કર્યું હતું, જેમાં હીરાથી જડિત આસ્તીનો અને કઢાઈવાળી પાછળની ડિઝાઇન હતી. તેમના ક્લાસિક રેડ લિપ્સ લુકે તેમને વધુ રોયલ અને સ્ટાઇલિશ દેખાડ્યા હતા. રેમ્પ વૉક બાદ ઐશ્વર્યાએ આંતરરાષ્ટ્રીય સુપરમૉડેલ્સ સાથે ફોટોશૂટ અને મસ્તી કરી હતી. પાછળના દ્રશ્યોમાં તેઓને હોલિવુડ અભિનેત્રી હાઇડી ક્લમ તથા અન્ય સેલિબ્રિટીઝ સાથે વાતચીત કરતાં અને પોઝ આપતાં જોવા મળ્યાં.
આ પ્રસંગે તેની પુત્રી આરાધ્યા બચ્ચન પણ તેમની સાથે રહી હતી. ઇવેન્ટ દરમિયાન ઐશ્વર્યાએ પોતાની જૂની મિત્ર તથા અભિનેત્રી ઇવા લૉન્ગોરિયા સાથે પણ મુલાકાત કરી હતી. ઐશ્વર્યાએ ફરી એકવાર સાબિત કરી દીધું કે તેઓ વૈશ્વિક મંચ પર ભારતનું પ્રતિનિધિત્વ કરતા એક સાચા ગ્લોબલ આઇકન છે.