નવી દિલ્હી, 30 જુલાઈ 2026: Ajinkya Rahane Retirement ભારતના અનુભવી ક્રિકેટર અજિંક્ય રહાણેએ આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. તેમણે ઇન્સ્ટાગ્રામ પર એક વીડિયો દ્વારા આ સમાચાર શેર કર્યા. આ જાહેરાત કરતી વખતે તેઓ ખૂબ ભાવુક થઈ ગયા હતા; તેમનો અવાજ ભરાઈ આવ્યો હતો અને તેઓ રડમસ દેખાતા હતા. ભારે અવાજે રહાણેએ BCCI, તેમના સાથી ક્રિકેટરો, તેમની પત્ની અને ચાહકોનો આભાર માન્યો.
વીડિયોની સાથેના કેપ્શનમાં રહાણેએ લખ્યું, “કેપ 278 હવે વિદાય લઈ રહી છે. વર્ષો દરમિયાન મળેલા પ્રેમ અને સમર્થન બદલ આભાર. હું હંમેશાં આભારી રહીશ.” રહાણેએ 31 ઓગસ્ટ, 2011ના રોજ ઈંગ્લેન્ડ સામે પોતાની આંતરરાષ્ટ્રીય (T20I) કારકિર્દીની શરૂઆત કરી હતી.
રહાણે લાંબા સમયથી ભારતીય ટીમની બહાર હતા. તેમણે તેમની છેલ્લી આંતરરાષ્ટ્રીય મેચ 2023માં રમી હતી; તેઓ છેલ્લે જુલાઈ 2023માં વેસ્ટ ઈન્ડિઝ સામે ટેસ્ટ મેચ રમતા જોવા મળ્યા હતા. આ દરમિયાન, તેમણે તેમની છેલ્લી વન-ડે (ODI) 2018માં અને છેલ્લી T20 આંતરરાષ્ટ્રીય મેચ 2016માં રમી હતી.
6 ટેસ્ટ મેચોમાં સુકાનીપદ સંભાળ્યું
રહાણેએ પોતાની કારકિર્દી દરમિયાન 85 ટેસ્ટ, 90 વનડે અને 20 ટી20 આંતરરાષ્ટ્રીય મેચ રમી હતી. 144 ટેસ્ટ ઇનિંગ્સમાં તેણે 38.46 ની સરેરાશ અને 49.0 ના સ્ટ્રાઇક રેટથી 5,077 રન બનાવ્યા હતા. આ ફોર્મેટમાં તેણે 12 સદી અને 26 અડધી સદી ફટકારી હતી, જેમાં તેનો સર્વોચ્ચ સ્કોર 188 રન હતો. રહાણેએ 6 ટેસ્ટમાં ભારતીય ટીમનું નેતૃત્વ પણ કર્યું હતું; તેમના નેતૃત્વ હેઠળ ભારતે 4 મેચ જીતી હતી અને 2 મેચ ડ્રો કરી હતી.
વન-ડેમાં રહાણેનું પ્રદર્શન
આ બેટ્સમેને 87 વન-ડે (ODI) ઇનિંગ્સમાં 35.26ની સરેરાશ અને 78.63ના સ્ટ્રાઇક રેટ સાથે 2,962 રન બનાવ્યા હતા. તેણે વન-ડે ક્રિકેટમાં 24 અડધી સદી અને 3 સદી ફટકારી હતી. આ ઉપરાંત, 20 T20 ઇન્ટરનેશનલ મેચોમાં રહાણેએ 113.29ના સ્ટ્રાઇક રેટથી 375 રન બનાવ્યા હતા.
રહાણેએ ત્રણેય ફોર્મેટમાં ભારતીય ટીમનું નેતૃત્વ કર્યું હતું. તેણે ત્રણ વન-ડે મેચોમાં ભારતની કેપ્ટનશીપ કરી હતી અને તે તમામ મેચોમાં ભારતનો વિજય થયો હતો. T20 આંતરરાષ્ટ્રીય મેચોમાં રહાણેએ બે મેચોમાં ટીમનું નેતૃત્વ કર્યું હતું; જેમાં ભારત એક મેચ જીત્યું હતું અને બીજી મેચ હાર્યું હતું.
વધુ વાંચો: દિલ્હી-યુપીમાં ભારે વરસાદ, 14 રાજ્યોમાં એલર્ટ જાહેર, આસામમાં પૂરનો કહેર યથાવત
