અમદાવાદઃ પટ્રોલ-ડીઝલમાં તોતિંગ ભાવ વધારાને લીધે અનેક જીવન જરૂરિયાતની ચીજ-વસ્તુઓ પણ મોંઘીદાટ બની છે. સાથે જ ખેતીમાં ઉપયોગમાં લેવાતા ડીઝલથી ચાલતા ઓજારો ચલાવવા પણ મોંઘા બન્યા છે. સોરઠમાં હાલ મગફળીની સીઝન છે. એવામાં થ્રેશર પ્રત્યેક ખેડૂતોની જરૂરિયાત છે. બધા પાસે પોતાના થ્રેશર હોતા પણ નથી. પણ ડીઝલનો ભાવ વધતાં થ્રેશર ચલાવવાનો અને ખેતર સુધી લઇ જવાના ખર્ચમાં વધારો કરાતા ખેડુતોની મુશ્કેલી વધી છે.
ડીઝલમાં ભાવ વધારાથી ખેતી પણ હવે મોંઘી બની રહી છે. જેની સીધી અસર પાક જણસની પડતર કિંમત પર પડશે. બીજી તરફ ખેડૂતોને ડીઝલ તો બજાર ભાવેજ ખરીદવું પડે છે. આથી એમાં કોઇ જાતની રાહત મળતી નથી. જો ટેકાના ભાવમાં સરકાર વધારો કરી દે તો ખેડૂતોની કમાણી જળવાઇ રહે. ખેડુતોને પોતાની જણસ યાર્ડ સુધી પહોંચાડવાની છે તેના વાહન ભાડામાં પણ વધારો થવાનો જ છે. આમ ખેડૂતોને જણસ તૈયાર કરવાથી લઇને વાહન ભાડાંનો માર પડવાનો છે એ નક્કી છે. માણાવદરના એક ખેડુતના કહેવા મુજબ મારી પાસે 20 વર્ષથી થ્રેશર છે. ડીઝલનો ભાવ વધ્યો હોવાથી અમે પણ ભાવ વધાર્યા. બધા પાસે ટ્રેક્ટર કે થ્રેશર ન હોય. પહેલાં અમે 1 કલાકના 400 રૂપિયા લેતા. પણ ડીઝલના ભાવ વધવાથી અમારે આ વર્ષે ફરજિયાત 800 રૂપિયા કરવા પડશે. જો આવું જ રહેશે તો ખેડૂતો ફરી બળદગાડાએ આવી જશે. અને પહેલાંની જેમ હાથેથી મગફળી ખંખેરવાનો વારો આવશે. ઊના તાલુકાના એક ખેડુતે જણાવ્યું હતું કે, અમારી પોતાની જમીન ખેડવામાં 10 વર્ષ પહેલાં વિઘે 300 રૂપિયા લેખે 29 વીઘાનો રૂ. 9 હજાર ખર્ચ થતો. જે ડીઝલના ભાવ વધવાની 1 વીઘાનો ખર્ચ 600 રૂપિયા થઇ ગયો છે. આમ હવે અમારો ખર્ચ રૂ. 18 થી 20 હજાર થઇ ગયો છે.
