G20 સંમેલન બાદ ભારત અને સાઉદી વચ્ચે દ્વિપક્ષીય મંત્રણા,રાષ્ટ્રપતિ મુર્મુએ પ્રિન્સ સલમાનનું કર્યું સ્વાગત
દિલ્હી: ભારતની રાજધાની નવી દિલ્હીમાં 9-10 સપ્ટેમ્બરના રોજ G20 સમિટનું સફળતાપૂર્વક આયોજન કરવામાં આવ્યું હતું. આ સંમેલનમાં વિશ્વના ઘણા મોટા નેતાઓએ ભાગ લીધો છે. હવે સંમેલનની સમાપ્તિ પછી સાઉદી અરેબિયાના ક્રાઉન પ્રિન્સ મોહમ્મદ બિન સલમાન ભારતના રાજકીય પ્રવાસે છે. પ્રિન્સ સલમાન અને પીએમ મોદી ભારત અને સાઉદી વચ્ચેના દ્વિપક્ષીય સંબંધોને આગળ વધારવા પર ચર્ચા કરશે.
પીએમ મોદી સાથે વાતચીત પહેલા મોહમ્મદ બિન સલમાન રાષ્ટ્રપતિ ભવન પહોંચ્યા જ્યાં તેમનું ભવ્ય સ્વાગત કરવામાં આવ્યું. રાષ્ટ્રપતિ દ્રૌપદી મુર્મુ પણ તેમનું સ્વાગત કરવા પહોંચ્યા હતા. પ્રિન્સ સલમાનના ભારત પ્રવાસનો સોમવારે ત્રીજો દિવસ છે. આ પહેલા ભારત અને સાઉદી અરેબિયા વચ્ચે ઈન્ડિયા-સાઉદી ઈન્વેસ્ટમેન્ટ એગ્રીમેન્ટ હેઠળ અનેક કરારો પણ થયા છે. પ્રિન્સ સલમાન આજે રાત્રે સાઉદી અરેબિયા જવા રવાના થશે.
પીએમ મોદી અને પ્રિન્સ સલમાન હૈદરાબાદ હાઉસમાં મળશે. આ બેઠકમાં બંને નેતાઓ વેપાર, કનેક્ટિવિટી અને સુરક્ષા આધારિત મુદ્દાઓ પર ચર્ચા કરી શકે છે. G20 સંમેલનમાં સાઉદી અરેબિયા, ભારત, અમેરિકા અને યુરોપિયન યુનિયન વચ્ચે મેગા કોરિડોર બનાવવાનો નિર્ણય લેવામાં આવ્યો છે. આ ઐતિહાસિક પ્રોજેક્ટ હેઠળ યુરોપ અને ભારતને મધ્ય પૂર્વના માધ્યમથી જોડવામાં આવશે. આમાં તમામ દેશો સાથે મળીને કામ કરશે.
અગાઉ સાઉદી પ્રિન્સ સલમાને G20 સમિટના સફળ આયોજન માટે ભારતને અભિનંદન પાઠવ્યા છે. તેમણે કહ્યું કે G20 સંમેલનમાં ઘણા મુદ્દાઓ પર સહમતિ બની છે, જેનાથી આ સમૂહના દેશો સહિત સમગ્ર વિશ્વને ઘણા ફાયદા થશે. તેણે કહ્યું કે તે ભારત આવીને ખૂબ જ ખુશ છે. પ્રિન્સ સલમાનની આ બીજી ભારત મુલાકાત છે. અગાઉ તેઓ 2019માં ભારતની સત્તાવાર મુલાકાતે આવ્યા હતા.
