રસોઈમાં લાવો નવો ટ્વિસ્ટ: સાદી પૂરી કંટાળાજનક લાગે છે? તો ટ્રાય કરો આ 4 ટેસ્ટી સ્ટફ્ડ પૂરી

રોજરોજ સવારના નાસ્તામાં કે જમવામાં એ જ સાદી પૂરી ખાઈને જો ઘરના સભ્યો કંટાળી ગયા હોય, તો હવે કંઈક નવું ટ્રાય કરવાનો સમય આવી ગયો છે. રસોઈમાં થોડોક જ ફેરફાર કરીને તમે સાદી પૂરીને બદલે સ્વાદિષ્ટ અને હેલ્ધી ‘સ્ટફ્ડ પૂરી’ (ભરેલી પૂરી) તૈયાર કરી શકો છો. આ પૂરીઓ એટલી ટેસ્ટી બને છે કે તેના માટે કોઈ ખાસ શાકની પણ જરૂર પડતી નથી. ચાલો જાણીએ આવી જ 4 લોકપ્રિય સ્ટફ્ડ પૂરી બનાવવાની સરળ રીત:

ચણા દાળ પૂરી

સૌથી પહેલા ઘઉંના લોટમાં સ્વાદ અનુસાર મીઠું અને સહેજ મોણ નાખીને નરમ લોટ બાંધી લો. હવે બાફેલી ચણાની દાળને મિક્સરમાં અધકચરી (દરદરી) પીસી લો. આ પીસેલી દાળમાં ઝીણા સમારેલા લીલા મરચાં, આદુની પેસ્ટ, ધાણાજીરું, લાલ મરચું, મીઠું અને લીલા ધાણા ઉમેરીને સ્ટફિંગ તૈયાર કરો. લોટના નાના લુઆ બનાવી, તેમાં આ દાળનું મિશ્રણ ભરીને હળવા હાથે પૂરી વણી લો. ગરમ તેલમાં ધીમી આંચે સોનેરી થાય ત્યાં સુધી તળી લો. આ ગરમાગરમ પૂરી લીલી ચટણી કે દહીં સાથે અદભુત લાગે છે.

પનીર પૂરી

લોટ બાંધવાની રીત સરખી જ રહેશે. સ્ટફિંગ માટે એક બાઉલમાં છીણેલું પનીર લો. તેમાં લીલા મરચાં, આદુ, ધાણા પાવડર, શેકેલા જીરાનો પાવડર, મીઠું અને પુષ્કળ કોથમીર મિક્સ કરો. લોટની નાની પૂરી વણી વચ્ચે પનીરનું મિશ્રણ મૂકી, તેને બધી બાજુથી બંધ કરીને ફરીથી વણી લો. તેને ગરમ તેલમાં ક્રિસ્પી થાય ત્યાં સુધી તળો. આ પૂરી કેચઅપ સાથે બાળકોના લંચ બોક્સ માટે ઉત્તમ વિકલ્પ છે.

વટાણાની પૂરી

લીલા વટાણાને બાફીને હળવા મેશ કરી લો. હવે આ વટાણામાં લીલા મરચાં, આદુ, ધાણાજીરું, લાલ મરચું, મીઠું અને લીલી કોથમીર ઉમેરીને બરાબર મિક્સ કરી લો. ઘઉંના લોટના લુઆમાં આ વટાણાનું સ્ટફિંગ ભરીને સરસ ગોળ પૂરી વણી લો. તેલ ગરમ કરી મધ્યમ આંચ પર પૂરીને તળી લો. તમારી ગરમાગરમ ગ્રીન વટાણા પૂરી તૈયાર છે.

આલુ પૂરી

બટાકાની પૂરી નાના-મોટા સૌની ઓલ-ટાઇમ ફેવરિટ હોય છે. આ માટે સૌપ્રથમ બાફેલા બટાકાને મેશ કરી લો. તેમાં ઝીણા સમારેલા લીલા મરચાં, આદુ, ધાણાજીરું, લાલ મરચું પાવડર, થોડો ગરમ મસાલો, મીઠું અને લીલી કોથમીર નાખી મિશ્રણ તૈયાર કરો. લોટના ગુલ્લામાં આ બટાકાનું માવો ભરીને હળવા હાથે પૂરીનો આકાર આપો. તેને ગરમ તેલમાં ગુલાબી રંગની થાય ત્યાં સુધી તળી લો. અથાણું, દહીં અથવા ચા સાથે આ પૂરી ખાવાની મજા પડી જશે.