ગાંધીનગર, 25 જુલાઈ, 2026 – ગુજરાતમાં છેલ્લા થોડા દિવસથી થઈ રહેલી અતિવૃષ્ટિ દરમિયાન સરકારી તંત્ર, એનડીએફસી, એસડીએફસી દ્વારા સતત બચાવ અને સ્થળાંતરની કામગીરી કરવામાં આવી રહી છે. જોકે આ બધા ઉપરાંત ભારતીય સૈન્ય દ્વારા પણ અવિરતપણે કામગીરી કરીને લોકોને બચાવીને સલામત સ્થળે ખસેડવામાં આવી રહ્યા છે.
ગુજરાતના કેટલાક વિસ્તારો અને કેન્દ્રશાસિત પ્રદેશ દાદરા અને નગરહવેલીમાં સતત પડી રહેલા ભારે વરસાદને કારણે નિર્માણ પામેલી પૂરની પરિસ્થિતિનો તાત્કાલિક પ્રતિસાદ આપતાં, ભારતીય સેનાએ સધર્ન કમાન્ડના નેજા હેઠળ 23 જુલાઈ 2026ની સાંજે માનવતાવાદી સહાય અને આપત્તિ રાહત (HADR) કામગીરી શરૂ કરી હતી. અસરગ્રસ્ત વસ્તીને મદદ કરવા માટે એનડીઆરએફ (NDRF), એસડીઆરએફ (SDRF), સિવિલ પ્રશાસન અને અન્ય એજન્સીઓ સાથે સુમેળભર્યા સંકલન સાથે રાહત અને બચાવ કામગીરી સતત જારી છે.
સેનાએ અસરગ્રસ્ત વિસ્તારોમાં એન્જિનિયરિંગ અને મેડિકલ ટીમો સહિત 7 રાહત અને બચાવ ટુકડીઓ તૈનાત કરી છે. હાલમાં, નવસારીમાં 2 ટુકડીઓ, વલસાડ-વાપી વિસ્તારમાં 1, અમદાવાદમાં અમદાવાદ શહેર, અમદાવાદ ગ્રામ્ય અને અમદાવાદ-રાજકોટ હાઈવેને આવરી લેતી 3 ટુકડીઓ અને કેન્દ્રશાસિત પ્રદેશ દાદરા અને નગરહવેલીના સેલવાસમાં 1 ટુકડી કાર્યરત છે. આ ઉપરાંત, વડોદરા, અમદાવાદ અને જામનગર સહિતના મહત્ત્વના સ્થળોએ વધારાની રાહત અને બચાવ ટુકડીઓને સ્ટેન્ડબાય પર રાખવામાં આવી છે જેથી કરીને કોઈ પણ નવી કટોકટી ઊભી થાય તો તાત્કાલિક પ્રતિસાદ આપી શકાય.
કામગીરી શરૂ થઈ ત્યારથી, સેનાની ટીમોએ જળબંબાકાર થયેલા અને પહોંચવા મુશ્કેલ હોય તેવા વિસ્તારોમાં સતત બચાવ અને રાહત અભિયાન હાથ ધર્યા છે, જેમાં અત્યાર સુધીમાં ફસાયેલા 355 નાગરિકોને સુરક્ષિત રીતે બહાર કાઢવામાં આવ્યા છે. પૂરમાં ગરકાવ થયેલા મકાનો અને વિખૂટા પડેલા રહેણાંક વિસ્તારોમાં લાંબા સમયથી ફસાયેલા નાગરિકોને બહાર કાઢવા સહિતની બચાવ કામગીરી ઘણીવાર અત્યંત પડકારજનક પરિસ્થિતિઓમાં હાથ ધરવામાં આવી છે. મેડિકલ ટીમોએ તબીબી સહાયની જરૂરિયાત વાળા લોકોને તાત્કાલિક આરોગ્ય સેવાઓ પૂરી પાડી છે, જ્યારે રાહત ટીમોએ બચાવની રાહ જોઈ રહેલા અથવા સામાન્ય સંપર્ક પુનઃસ્થાપિત થવાની રાહ જોઈ રહેલા અસરગ્રસ્ત નિવાસીઓને ખોરાક, પીવાનું પાણી અને અન્ય આવશ્યક સામગ્રીનું વિતરણ કર્યું છે.
અસરગ્રસ્ત જિલ્લાઓમાં સમયસર બચાવ, રાહત અને માનવતાવાદી સહાય સુનિશ્ચિત કરવા માટે સિવિલ પ્રશાસન, નેશનલ અને સ્ટેટ ડિઝાસ્ટર રિસ્પોન્સ ફોર્સ, પોલીસ અને અન્ય ભાગીદારો સાથે સીમલેસ (અવિરત) સંકલન કરીને આ કામગીરી ચલાવવામાં આવી રહી છે.
