- રાષ્ટ્રીય શિક્ષણ નીતિ અંતર્ગત કરાયો ફેરફાર, હવે ,
- 30% હેતુલક્ષી અને 70% વર્ણનાત્મક પ્રશ્નો પૂછાશે,
- ધોરણ 9 અને 11માં વર્ણનાત્મક પ્રશ્નમાં આંતરિક વિકલ્પ આપવાની જગ્યાએ જનરલ વિકલ્પ અપાશે
ગાંધીનગરઃ ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા નવી શિક્ષણ નીતિ અંતર્ગત ધોરણ 9 અને 11ની પરીક્ષા પદ્ધતિમાં બદલાવ કરવામાં આવ્યો છે. જેમાં હેતુલક્ષી પ્રશ્નનો ગુણભાર અગાઉ 20 ટકા હતો તેની બદલે હવે 30 ટકા કરવામાં આવ્યો છે જ્યારે વર્ણનાત્મક પ્રશ્નોનો ગુણભાર અગાઉ 80% હતો તેની જગ્યાએ હવે 70% કરવામાં આવ્યો છે. આ ઉપરાંત ધોરણ 9 અને ધોરણ 11માં હાલ વર્ણનાત્મક પ્રશ્નમાં આંતરિક વિકલ્પ આપવાની જગ્યાએ પ્રશ્નના જનરલ વિકલ્પ આપવામાં આવશે. હેતુલક્ષી પ્રશ્નોના ગુણભારમાં વધારો થતા વિદ્યાર્થીઓને સરળતા રહેશે. આ ઉપરાંત વર્ણનાત્મક પ્રશ્નોમાં જનરલ વિકલ્પ આપવામાં આવતા વિદ્યાર્થીઓને ફાયદો થશે.
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ 9થી 11ના પરીક્ષા પદ્ધતિમાં કરાયેલા ફેરફારોનો પરિપત્ર તમામ જિલ્લા શિક્ષણ અધિકારીઓને મોકલવામાં આવ્યો છે. આ અંગે ડીઈઓએ કહ્યુ હતું કે, રાષ્ટ્રીય શિક્ષણ નીતિ (NEP)-2020 અન્વયે શૈક્ષણિક વર્ષ 2023-24માં ગુજરાત માધ્યમિક અને ઉચ્ચતર માધ્યમિક શિક્ષણ બોર્ડની ધોરણ-10 અને 12ની પરીક્ષા પદ્ધતિમાં ફેરફાર કરવામાં આવ્યો હતો. ધોરણ-9થી 12ની પરીક્ષા પદ્ધતિમાં એકસૂત્રતા જળવાય તે હેતુથી શૈક્ષણિક વર્ષ 2024-25થી ધોરણ-9 અને ધોરણ-11ની હાલની પરીક્ષા પદ્ધતિમાં કેટલાક ફેરફાર કરી સરળીકરણ કરવા અંગે થયેલી દરખાસ્ત ઉપર સરકાર દ્વારા મંજૂરી આપવામાં આવી છે.
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ-9 અને ધોરણ-11 (તમામ પ્રવાહ) તેમજ સંસ્કૃત પ્રથમા અને માધ્યમાની સુધારેલ પરીક્ષા પદ્ધતિ શૈક્ષણિક વર્ષ 2024-25થી અમલમાં આવશે. તે માટે રાષ્ટ્રીય શિક્ષણ નીતિ (NEP)-2020 અન્વયે ક્ષમતા આધારિત મૂલ્યાંકન મુજબ તજજ્ઞો દ્વારા તૈયાર કરવામાં આવ્યું છે. આ વિષયોના પ્રશ્નપત્ર પરિરૂપ, ગુણભાર અને નમૂનાના પ્રશ્નપત્રો તમામ માધ્યમિક અને ઉચ્ચતર માધ્યમિક શાળાઓને જાણ કરવા જણાવાયું હતું. (File photo)