નવી દિલ્હીઃ પ્રધાનમંત્રી નરેન્દ્ર મોદીએ મુંબઈના જિયો વર્લ્ડ કન્વેન્શન સેન્ટર ખાતે પ્રથમ વર્લ્ડ ઓડિયો-વિઝ્યુઅલ એન્ટરટેઈનમેન્ટ સમિટ (વેવ્સ) 2025નું ઉદ્ઘાટન કર્યું. એટલું જ નહીં, આ દરમિયાન પીએમ મોદીએ ભારતીય સિનેમાની 5 મહાન હસ્તીઓ: ગુરુ દત્ત, પી. ભાનુમતિ, રાજ ખોસલા, ઋત્વિક ઘટક અને સલિલ ચૌધરી પરની સ્મારક ટપાલ ટિકિટો પણ લોન્ચ કરી.
મનોરંજન ઉદ્યોગના ભવિષ્યની ચર્ચા કરવા માટે એક વૈશ્વિક પ્લેટફોર્મ પૂરું પાડશે
આ કાર્યક્રમ ઑડિયો-વિઝ્યુઅલ અને મનોરંજન ઉદ્યોગના ભવિષ્યની ચર્ચા કરવા માટે એક વૈશ્વિક પ્લેટફોર્મ પૂરું પાડશે. આ કોન્ફરન્સનો વિષય ‘કનેક્ટિંગ ક્રિએટર્સ, કનેક્ટિંગ કન્ટ્રીઝ’ છે. આ પરિષદનો ઉદ્દેશ્ય ભારતને મીડિયા, મનોરંજન અને ડિજિટલ નવીનતા માટે વૈશ્વિક કેન્દ્ર તરીકે સ્થાપિત કરવાનો છે. આમાં આ ક્ષેત્રમાં ભારતની ક્ષમતાઓ દર્શાવવા માટે ફિલ્મો, OTT, ગેમિંગ, કોમિક્સ, ડિજિટલ મીડિયા, આર્ટિફિશિયલ ઇન્ટેલિજન્સ, બ્રોડકાસ્ટિંગ અને ઉભરતી ટેકનોલોજીને એકસાથે લાવવાનો સમાવેશ થાય છે.
100થી વધુ દેશોના કલાકારો, રોકાણકારો અને નીતિ નિર્માતાઓ ભેગા થયા
આ કાર્યક્રમ દરમિયાન, PM મોદીએ પોતાના સંબોધનમાં કહ્યું કે આજે મુંબઈમાં, 100 થી વધુ દેશોના કલાકારો, રોકાણકારો અને નીતિ નિર્માતાઓ એક છત નીચે ભેગા થયા છે. એક રીતે, આજે અહીં વૈશ્વિક પ્રતિભા અને વૈશ્વિક સર્જનાત્મકતાના ઇકો-સિસ્ટમનો પાયો નખાયો છે.
છેલ્લી સદીમાં, ભારતીય સિનેમાએ ભારતને વિશ્વના દરેક ખૂણામાં લઈ જવામાં સફળતા મેળવી છે
PM મોદીએ વધુમાં કહ્યું- “વર્લ્ડ ઓડિયો વિઝ્યુઅલ અને એન્ટરટેઈનમેન્ટ સમિટ એટલે કે વેવ્સ.. તે ફક્ત એક ટૂંકાક્ષર નથી. તે એક લહેર છે – સંસ્કૃતિની, સર્જનાત્મકતાની. વેવ્સ એક વૈશ્વિક પ્લેટફોર્મ છે જે તમારા જેવા દરેક કલાકાર, દરેક નિર્માતાનું છે. જ્યાં દરેક કલાકાર, દરેક યુવા એક નવી યોજના સાથે સર્જનાત્મક દુનિયા સાથે જોડાશે. આજે 1 મે છે, 112 વર્ષ પહેલાં, 3 મે, 1913 ના રોજ, ભારતમાં પહેલી ફીચર ફિલ્મ રાજા હરિશ્ચંદ્ર રિલીઝ થઈ હતી, તેના નિર્માતા દાદાસાહેબ ફાળકેજી હતા અને ગઈકાલે તેમની જન્મજયંતિ હતી. છેલ્લી એક સદીમાં, ભારતીય સિનેમા ભારતને વિશ્વના દરેક ખૂણામાં લઈ જવામાં સફળ રહ્યું છે.”
આવનારા વર્ષોમાં દરેકના પ્રયાસો વેવ્સને નવી ઊંચાઈઓ પર લઈ જશે
પોતાના સંબોધનમાં તેમણે આગળ કહ્યું- “આજે વેવ્ઝના આ મંચ પર, આપણે ટપાલ ટિકિટો દ્વારા ભારતીય સિનેમાના ઘણા દિગ્ગજોને યાદ કર્યા છે. પાછલા વર્ષોમાં, હું ગેમિંગ જગતના લોકોને મળ્યો છું, ક્યારેક સંગીત જગતના, ક્યારેક ફિલ્મ નિર્માતાઓ, ક્યારેક પડદા પર ચમકતા ચહેરાઓ. આ ચર્ચાઓમાં, ભારતની સર્જનાત્મકતા, સર્જનાત્મક ક્ષમતા અને વૈશ્વિક સહયોગની વારંવાર ચર્ચા થતી હતી. લાલ કિલ્લા પરથી, મેં ‘સબકા પ્રયાસ’ વિશે વાત કરી છે. આજે મારો વિશ્વાસ વધુ મજબૂત બન્યો છે કે તમારા બધાના પ્રયાસો આવનારા વર્ષોમાં વેવ્ઝને નવી ઊંચાઈઓ આપશે.”