ભોપાલ, 02 ઓક્ટોબર 2026: આગ્રા-મુંબઈ નેશનલ હાઈ-વે પર ઈન્દોર નજીક બેરુઘાટ ખાતે રાત્રે એક ભયાનક અકસ્માત સર્જાયો હતો. આ અકસ્માતમાં ત્રણ લોકોએ જીવ ગુમાવ્યા હતા.
માનપુરથી ધામનોદ તરફ જઈ રહેલો એક ટ્રક બેકાબૂ બની ગયો; સંતુલન ગુમાવીને તે બીજી લેનમાં ઘૂસી ગયો અને બે ટ્રક સાથે અથડાયો. ત્યારબાદ, તે બેકાબૂ ટ્રક અન્ય એક ટ્રક સાથે પણ અથડાયો.
અકસ્માતમાં ત્રણ લોકોનાં મોત
આગ્રા-મુંબઈ રાષ્ટ્રીય ધોરીમાર્ગ પર વાહનો વચ્ચેની ટક્કર એટલી ભયાનક હતી કે વાહનોને ભારે નુકસાન થયું હતું અને કેટલાક લોકો તેમાં ફસાઈ ગયા હતા. ત્રણ લોકોનાં ઘટનાસ્થળે જ મોત નીપજ્યાં હતાં. પોલીસ આ મામલે તપાસ કરી રહી છે.
અકસ્માત અંગેની માહિતી મળતાં જ માનપુર સ્ટેશન હાઉસ ઓફિસર અરુણ સોલંકી પોલીસની ટીમ સાથે ઘટનાસ્થળે પહોંચ્યા. પોલીસે તાત્કાલિક રાહત અને બચાવ કામગીરી શરૂ કરી અને ટ્રક નીચે ફસાયેલા લોકોને બહાર કાઢવાનો પ્રયાસ કર્યો.
આગ્રા-મુંબઈ રાષ્ટ્રીય ધોરીમાર્ગ પર થયેલા અકસ્માતને કારણે બંને બાજુ વાહનોની લાંબી કતારો લાગી ગઈ. થોડી જ વારમાં કિલોમીટરો સુધી ટ્રાફિક જામ સર્જાયો. આ ભીડને હટાવવા માટે પોલીસે ભારે જહેમત ઉઠાવવી પડી.
વધુ વાંચો: બિહારના પૂર્વી ચંપારણમાં હૃદયદ્રાવક ઘટના, તળાવમાં ડૂબવાથી 4 બાળકીના મોત
