યેલાપુરાઃ બુધવારે સવારે કર્ણાટકમાં એક ટ્રક ૫૦ મીટર ઊંડી ખાઈમાં પડી જતાં ઓછામાં ઓછા આઠ લોકોના મોત થયા હતા અને ૧૦ અન્ય ઘાયલ થયા હતા. ઉત્તરા કન્નડના પોલીસ અધિક્ષક (એસપી) એમ. નારાયણે જણાવ્યું હતું કે બધા પીડિતો ફળ વિક્રેતા હતા અને સાવનુરથી યેલાપુરા મેળામાં ફળો વેચવા જઈ રહ્યા હતા.
સાવનુર-હુબલી રોડ પર જંગલ વિસ્તારમાંથી પસાર થતી વખતે આ અકસ્માત થયો. “સવારે લગભગ ૫.૩૦ વાગ્યે, ટ્રક ડ્રાઈવરે બીજા વાહનને રસ્તો આપવાના પ્રયાસમાં ટ્રકને ડાબી તરફ ફેરવી દીધી, પરંતુ વાહન ખૂબ જ વળ્યું અને લગભગ ૫૦ મીટર ઊંડી ખાડીમાં પડી ગયું,” તેમ ઉચ્ચ અધિકારી નારાયણે જણાવ્યું હતું.
તેમણે કહ્યું કે ખીણ તરફ જતા રસ્તા પર કોઈ સલામતી દિવાલ નથી. અધિકારીએ જણાવ્યું કે, “આઠ લોકોના ઘટનાસ્થળે જ મોત થયા હતા અને બે ગંભીર રીતે ઘાયલ થયા હતા.” ઘાયલોને સારવાર માટે હુબલીની કર્ણાટક મેડિકલ કોલેજ અને રિસર્ચ ઇન્સ્ટિટ્યૂટ (KIMS) હોસ્પિટલમાં દાખલ કરવામાં આવ્યા છે.