ઘરે જ બનાવો રેસ્ટોરન્ટ જેવું સ્વાદિષ્ટ પનીર શિમલા મરચાંનું શાક, જાણો બનાવવાની સરળ રીત

પનીર શિમલા મરચાં એ ઉત્તર ભારતની એક લોકપ્રિય અને અત્યંત સ્વાદિષ્ટ વાનગી છે. તેના આકર્ષક રંગ, મનમોહક સુગંધ અને લાજવાબ સ્વાદને કારણે તે દરેક ઘરમાં પસંદ કરવામાં આવે છે. જ્યારે તમારે ઘરે બેઠા જ રેસ્ટોરન્ટ જેવું ભોજન લેવાની ઈચ્છા હોય, ત્યારે આ રેસીપી શ્રેષ્ઠ વિકલ્પ સાબિત થાય છે. આ વાનગીમાં નરમ પનીર અને થોડા ક્રંચી શિમલા મરચાંનું પરફેક્ટ કોમ્બિનેશન હોય છે, જે મસાલાઓ સાથે મળીને શાનદાર ફ્લેવર આપે છે.

• સામગ્રી

પનીર: 250 ગ્રામ (ચોરસ ટુકડામાં)
શિમલા મરચાં: 2 નંગ (લાંબી ચીરીઓમાં કાપેલા)
ટામેટા: 2 નંગ
લીલા મરચાં: 2 નંગ (ઝીણા સમારેલા)
આદુ: 1 ઈંચનો ટુકડો (છીણેલું)
તેલ: 2 ટેબલ સ્પૂન
મસાલા: જીરું (½ ચમચી), હળદર (¼ ચમચી), ધાણાજીરું પાવડર (1 ચમચી), લાલ મરચું (½ ચમચી), ગરમ મસાલો (¼ ચમચી)
મીઠું: સ્વાદ મુજબ
કોથમી

• બનાવવાની રીત

સૌ પ્રથમ એક પેનમાં તેલ ગરમ કરો. તેલ ગરમ થાય એટલે તેમાં જીરું નાખીને હળવું સાંતળો. ત્યારબાદ તેમાં આદુ અને લીલા મરચાં ઉમેરીને તેની સુગંધ આવે ત્યાં સુધી ભોણો. હવે તેમાં ટામેટાની પ્યુરી અને તમામ સૂકા મસાલા (હળદર, ધાણાજીરું, લાલ મરચું અને મીઠું) ઉમેરીને બરાબર મિક્સ કરો. આ મસાલાને ત્યાં સુધી પકાવો જ્યાં સુધી તેમાંથી તેલ છૂટું ન પડવા લાગે. મસાલો તૈયાર થઈ જાય એટલે તેમાં સમારેલા શિમલા મરચાં ઉમેરો. તેને માત્ર 2-3 મિનિટ સુધી જ પકાવો જેથી તેનો ‘ક્રંચી’ સ્વાદ જળવાઈ રહે. તેને વધારે નરમ ન કરવા, કારણ કે તો જ રેસ્ટોરન્ટ જેવો ટેસ્ટ આવશે. હવે તેમાં પનીરના ટુકડા ઉમેરો અને હળવા હાથે મિક્સ કરો જેથી પનીર તૂટી ન જાય. 2-3 મિનિટ સુધી ધીમા તાપે તેને પકાવો જેથી પનીરમાં મસાલાનો સ્વાદ બરાબર બેસી જાય.

છેલ્લે ગરમ મસાલો અને ઉપરથી ઝીણા સમારેલા લીલા ધાણા ભભરાવીને ગેસ બંધ કરી દો. તૈયાર છે ગરમા-ગરમ પનીર શિમલા મરચાંનું શાક! તમે તેને રોટલી, પરાઠા, નાન અથવા જીરા રાઈસ સાથે પીરસી શકો છો. ઘરે બનાવેલી આ વાનગી સાદગી સાથે રેસ્ટોરન્ટ જેવો જ ઉત્તમ અનુભવ આપશે.