નવી દિલ્હી, 14 ઓગસ્ટ 2026: Mitchell Starc set a ‘world record’ ઓસ્ટ્રેલિયાના દિગ્ગજ ઝડપી બોલર મિશેલ સ્ટાર્કે ટેસ્ટ ક્રિકેટમાં વધુ એક મહત્વપૂર્ણ સિદ્ધિ હાંસલ કરી છે. ડાર્વિનમાં બાંગ્લાદેશ સામેની પ્રથમ ટેસ્ટ દરમિયાન શાદમાન ઈસ્લામને આઉટ કરીને તેમણે ઈતિહાસ રચ્યો અને ટેસ્ટ ક્રિકેટમાં સૌથી વધુ વિકેટ લેનારા ડાબા હાથના બોલર બન્યા. બાંગ્લાદેશની પ્રથમ ઇનિંગ્સની નવમી ઓવરમાં સ્ટાર્કે શાદમાન ઇસ્લામની વિકેટ ઝડપી હતી. નાથન લાયને કેચ પકડ્યો હતો અને આ વિકેટ સાથે સ્ટાર્કની ટેસ્ટ વિકેટોની સંખ્યા 434 પર પહોંચી હતી. આ મેચ પહેલાં, સ્ટાર્ક અને શ્રીલંકાના દિગ્ગજ સ્પિનર રંગના હેરાથ બંને 433 વિકેટ સાથે સમાન સ્તરે હતા. શાદમાનની વિકેટ લઈને સ્ટાર્કે હેરાથને પાછળ છોડી દીધા અને ડાબા હાથના બોલર તરીકે સૌથી વધુ ટેસ્ટ વિકેટ લેવાનો રેકોર્ડ પોતાના નામે કર્યો.
કપિલ દેવનો રેકોર્ડ પણ સરભર કર્યો
સ્ટાર્ક માટે આ સિદ્ધિ વિશેષ મહત્વ ધરાવે છે કારણ કે પોતાની 434મી વિકેટ ઝડપીને તેમણે ભારતના દિગ્ગજ ઓલરાઉન્ડર અને ભૂતપૂર્વ કેપ્ટન કપિલ દેવના રેકોર્ડની બરાબરી કરી લીધી છે. કપિલ દેવે 131 ટેસ્ટ મેચમાં 434 વિકેટ લીધી હતી, જ્યારે સ્ટાર્કે માત્ર 106 ટેસ્ટમાં આ સિદ્ધિ હાંસલ કરી છે. હવે ટેસ્ટ ક્રિકેટમાં સૌથી વધુ વિકેટ લેનારા ખેલાડીઓની સર્વકાલીન યાદીમાં આ બંને સંયુક્ત રીતે 11મા સ્થાને છે.
ટેસ્ટ ક્રિકેટમાં સૌથી વધુ વિકેટ લેનાર ડાબા હાથના બોલર
મિશેલ સ્ટાર્ક – 434 વિકેટ
રંગના હેરાથ – 433 વિકેટ
વસીમ અકરમ – 414 વિકેટ
ડેનિયલ વેટોરી – 362 વિકેટ
ચામિંડા વાસ – 355 વિકેટ
રવિન્દ્ર જાડેજા – 348 વિકેટ
