ચંડીગઢ, 7 એપ્રિલ, 2026 – પંજાબમાં કોંગ્રેસમાંથી હાંકી કાઢવામાં આવેલા નવજોતસિંહ સિદ્ધુના પત્ની નવજોત કૌરે વિધાનસભા ચૂંટણી 2027 પહેલાં પોતાના નવા પક્ષની જાહેરાત કરી છે. કોંગ્રેસમાંથી હટાવવામાં આવ્યા બાદ નવજોત કૌરે મોટું રાજકીય ડગલું ભરીને પંજાબમાં રાજકીય ગરમાવો વધારી દીધો છે.
સોમવાર, 6 એપ્રિલની મોડી રાત્રે પોતાના સત્તાવાર સોશિયલ મીડિયા પ્લેટફોર્મ X પર પોસ્ટ કરીને ડૉ. નવજોત કૌર સિદ્ધુએ આ અંગે જાણકારી આપી હતી. તેમણે પોતાની પાર્ટીનું નામ ‘ભારતીય રાષ્ટ્રવાદી પાર્ટી’ રાખ્યું છે. તેમણે પોસ્ટમાં લખ્યું છે કે તેઓ પોતાની પાર્ટીની જાહેરાત કરવા માટે લાંબા સમયથી રાહ જોઈ રહ્યા હતા. તેમણે જણાવ્યું કે તેઓ રાષ્ટ્રીય સ્તર પર એક નવા વિકલ્પ પર કામ કરી રહ્યા છે અને પોતાનું જીવન દેશ માટે સમર્પિત કરવા માંગે છે, તેથી આ પાર્ટીની જાહેરાત કરવામાં આવી છે.
The much awaited announcement ;we have been working on a new alternative at a national level after carefully monitoring and reviewing the current standards of performance of political leaders. Just wanting to dedicate our lives for our country giving back to the people what they… pic.twitter.com/5ypRNoX21Q
— Dr Navjot Sidhu (@NavjotSidh42212) April 6, 2026
સોશિયલ મીડિયા હેન્ડલ દ્વારા કરી જાહેરાત
ડૉ. નવજોત કૌર સિદ્ધુએ X પર તસવીર શેર કરતા લખ્યું હતું કે, “રાજકીય નેતાઓના વર્તમાન પ્રદર્શનના ધોરણોની સાવચેતીપૂર્વક દેખરેખ અને સમીક્ષા કર્યા પછી, અમે રાષ્ટ્રીય સ્તર પર એક નવા વિકલ્પ પર કામ કરી રહ્યા છીએ. અમે અમારું જીવન દેશ માટે સમર્પિત કરવા માંગીએ છીએ, જેથી જનતાને તે બધું પાછું આપી શકીએ જેના તેઓ હકદાર છે અને અમારી પાસે અપેક્ષા રાખે છે. ભગવાને કેટલાક સમાન વિચારધારા ધરાવતા વ્યક્તિઓને સાથે લાવ્યા છે, જેમાં દરેક રાજ્યમાં ન્યાય, શાંતિ પ્રદાન કરવા અને પ્રેમના માધ્યમથી ઉચ્ચ ચેતનાની ઊર્જા સાથે કાર્ય કરવાના સહિયારા લક્ષ્ય સાથે કામ કરવાની ક્ષમતા, આત્મવિશ્વાસ, સાહસ અને દૃઢ સંકલ્પ છે, અને જે વાહેગુરુ જી અમારી પાસે ઈચ્છે છે, તેને પૂર્ણ કરવાનું છે.”
‘પંજાબનું ખોવાયેલું ગૌરવ પાછું અપાવીશું’
ડૉ. નવજોત કૌર સિદ્ધુએ આગળ લખ્યું છે કે, “અમે પંજાબને તેનું ખોવાયેલું ગૌરવ પાછું મેળવવામાં મદદ કરીશું, એક સુવર્ણ રાજ્ય તરીકે, જ્યાં લોકો પ્રેમ, ભાગીદારી, ન્યાય, સ્વતંત્રતાના અધિકાર અને નિઃસ્વાર્થ સેવા તથા આધ્યાત્મિક વિકાસના ઉદ્દેશ્યથી કામ કરવાની શક્તિને જાણે છે, કોઈ પણ બાહ્ય દખલ વગર પોતાના લક્ષ્ય, મૂલ્યો અને વિઝન પ્રાપ્ત કરવા માટે. પંજાબની જનતાની, જનતા માટે અને જનતા દ્વારા સરકાર. સત્ય અને પ્રેમના માર્ગ પર ચાલનારા આધ્યાત્મિક ગુરુઓની સહાયથી લોકોના ઘાયલ આત્માઓને સાજા કરવા, જે વાહેગુરુ જીનો સંદેશ છે.”
