વારાણસી: ઉત્તર પ્રદેશના વારાણસીમાં દેવ દિવાળીના પાવન પર્વની ભવ્ય ઉજવણીની તૈયારીઓ શરૂ થઈ ગઈ છે. આ પ્રસંગે કાશીના ગંગા ઘાટો 11 લાખથી વધુ માટીના દીવડાઓના પ્રકાશથી ઝળહળી ઊઠશે. દર વર્ષે દેશ-વિદેશના શ્રદ્ધાળુઓ માટે આકર્ષણનું કેન્દ્ર બનતી દેવ દિવાળીને લઈને વહીવટી તંત્ર દ્વારા વિશેષ આયોજન કરવામાં આવી રહ્યું છે.
પ્રાપ્ત માહિતી અનુસાર, 20થી 23 નવેમ્બર દરમિયાન નમો ઘાટ પર ‘ગંગા મહોત્સવ’નું આયોજન કરવામાં આવશે. જ્યારે 24 નવેમ્બરે કારતક પૂર્ણિમાના દિવસે દેવ દિવાળીની ઉજવણી થશે.
આ વખતે ગંગામાં નૌકાઓના સંચાલન માટે પ્રથમ વખત ટુ-વે લેન સિસ્ટમ અમલમાં મૂકવામાં આવશે. આ વ્યવસ્થા હેઠળ નૌકાઓની અવરજવર માટે અલગ-અલગ માર્ગ નક્કી કરવામાં આવશે, જેથી ભીડનું નિયંત્રણ અને સુરક્ષા વ્યવસ્થા વધુ સુવ્યવસ્થિત બની શકે.
દેવ દિવાળીના આયોજનને ધ્યાનમાં રાખીને સુરક્ષા વ્યવસ્થાને 10 ઝોન અને 21 સેક્ટરમાં વહેંચવામાં આવશે. 24 નવેમ્બરની સાંજે ચેતસિંહ ઘાટ પર ભવ્ય લેસર શો યોજાશે. દશાશ્વમેધ ઘાટ પર ગંગા મહાઆરતીનું આયોજન કરવામાં આવશે. આ ઉપરાંત કાશી વિશ્વનાથ ધામની સામે પર્યાવરણને અનુકૂળ ગ્રીન આતશબાજી પણ કરવામાં આવશે.
આમ, 11 લાખથી વધુ દીવડાઓની રોશની, ગંગા આરતી, લેસર શો અને સાંસ્કૃતિક કાર્યક્રમો સાથે આ વર્ષે પણ કાશીની દેવ દિવાળી ભવ્ય અને આકર્ષક બનવાની અપેક્ષા છે.
