પીએમ મોદીએ જોધપુર એરપોર્ટના નવા ટર્મિનલનું ઉદ્ઘાટન કર્યું: કનેક્ટિવિટી વધારવા નવી ઉડાન યોજના પણ લોન્ચ

જોધપુર, 4 જુલાઈ 2026: વડાપ્રધાન નરેન્દ્ર મોદીએ શનિવારે રાજસ્થાનના જોધપુર ખાતે નવધિર્મિત અત્યાધુનિક એરપોર્ટ ટર્મિનલ ભવનનું ભવ્ય ઉદ્ઘાટન કર્યું છે. આ ખાસ પ્રસંગે તેમણે દેશમાં પ્રાદેશિક હવાઈ કનેક્ટિવિટીને વધુ મજબૂત અને વ્યાપક બનાવવાના હેતુથી સુધારેલી ઉડાન યોજનાનો પણ શુભારંભ કરાવ્યો હતો. સરકારના જણાવ્યા અનુસાર, આ મહત્વકાંક્ષી પરિયોજનાઓથી દેશમાં પ્રવાસન, વેપાર, રોકાણ અને રોજગારીની તકોને એક નવી ગતિ મળશે. જોધપુર એરપોર્ટ પર આગમન બાદ વડાપ્રધાને વ્યક્તિગત રીતે નવા ટર્મિનલ ભવનનું નિરીક્ષણ કર્યું હતું. આ દરમિયાન કેન્દ્રીય નાગરિક ઉડ્ડયન મંત્રી રામમોહન નાયડુ અને કેન્દ્રીય મંત્રી ગજેન્દ્ર સિંહ શેખાવતે તેમને પ્રોજેક્ટની મુખ્ય લાક્ષણિકતાઓથી માહિતગાર કર્યા હતા, જે બાદ વડાપ્રધાને ઔપચારિક રીતે તેનું લોકાર્પણ કર્યું હતું.

અંદાજે 480 કરોડ રૂપિયાના ખર્ચે વિકસાવવામાં આવેલું આ અત્યાધુનિક ટર્મિનલ ભવન 23,000 ચોરસ મીટર કરતા પણ વધુ વિસ્તારમાં ફેલાયેલું છે. આ નવા ટર્મિનલની ક્ષમતા દર વર્ષે આશરે 20 લાખ મુસાફરોની અવરજવરને ખૂબ જ સરળતાથી સંભાળવાની છે. એરપોર્ટ ટર્મિનલમાં તમામ પ્રકારની આધુનિક પેસેન્જર સુવિધાઓ ઉપલબ્ધ કરાવવામાં આવી છે, જેથી મુસાફરોને વધુ અનુકૂળ, ઝડપી અને વૈશ્વિક સ્તરનો પ્રવાસ અનુભવ મળી શકે.

જોધપુરના આ નવા ટર્મિનલની ડિઝાઇનમાં રાજસ્થાનની પરંપરાગત સ્થાપત્ય કલા અને ભવ્ય વારસાની ઝાંખી જોવા મળે છે. ભવનના નિર્માણમાં સુંદર મેહરાબ, ઝરૂખાઓ અને સ્થાનિક વાસ્તુકલાના તત્વોને આધુનિક બાંધકામ શૈલી સાથે ખૂબ જ સુંદર રીતે સાંકળવામાં આવ્યા છે. આ ઉપરાંત, પર્યાવરણની જાળવણીને ધ્યાનમાં રાખીને આ ભવનમાં ઊર્જા કાર્યક્ષમ ટેકનોલોજી, જળ સંરક્ષણ પ્રણાલી અને ગ્રીન બિલ્ડિંગના કડક ધોરણો અપનાવવામાં આવ્યા છે. આ પ્રોજેક્ટનો મુખ્ય લક્ષ્યાંક 5-સ્ટાર GRIHA (ગ્રીન રેટિંગ ફોર ઇન્ટિગ્રેટેડ હેબિટેટ એસેસમેન્ટ) પ્રમાણપત્ર મેળવવાનો છે.

• સુધારેલી ‘ઉડાન’ યોજનાને મળી નવી પાંખો

વડાપ્રધાન મોદીએ આ મંચ પરથી દેશવાસીઓ માટે સુધારેલી ‘ઉડાન’ (ઉડે દેશ કા આમ નાગરિક) યોજના પણ દેશને સમર્પિત કરી હતી. કેન્દ્ર સરકારે આ વ્યાપક યોજના માટે 28,840 કરોડ રૂપિયાની માતબર રકમની જોગવાઈ કરી છે. આ યોજનાનો મુખ્ય ઉદ્દેશ્ય આગામી 10 વર્ષમાં દેશના નાગરિક ઉડ્ડયન ક્ષેત્રનો અભૂતપૂર્વ વિસ્તાર કરવાનો અને અંતરિયાળ તેમજ દૂર-દરાજના વિસ્તારો સુધી હવાઈ જોડાણને મજબૂત બનાવવાનો છે.

આ નવી યોજના હેઠળ દેશભરમાં હાલમાં વણવપરાયેલી પડેલી હવાઈ પટ્ટીઓ (એરસ્ટ્રિપ્સ) નો ઉપયોગ કરીને 100 નવા એવા હવાઈ મથકોના વિકાસ પર વિશેષ ભાર મૂકવામાં આવશે, જેના માટે 12,000 કરોડ રૂપિયાથી વધુનું બજેટ નક્કી કરવામાં આવ્યું છે. આ ઉપરાંત, પ્રાદેશિક એરપોર્ટના પ્રારંભિક સંચાલન અને જાળવણીને ટેકો આપવા માટે 2,500 કરોડ રૂપિયાથી વધુની આર્થિક સહાય પૂરી પાડવામાં આવશે. સરકારે દેશના અત્યંત દુર્ગમ અને પહાડી વિસ્તારોમાં પણ બહેતર હવાઈ કનેક્ટિવિટી સુનિશ્ચિત કરવા માટે 200 આધુનિક હેલીપેડ વિકસાવવાની મોટી યોજના તૈયાર કરી છે. સરકારનું દ્રઢપણે માનવું છે કે જોધપુર એરપોર્ટનું આ નવું ટર્મિનલ અને સુધારેલી ઉડાન યોજના દેશના ઉડ્ડયન ક્ષેત્રને નવી ઊંચાઈએ લઈ જશે.