નવી દિલ્હી, 21 જુલાઈ 2026: કોંગ્રેસ પાર્ટીએ NEET પેપર લીક મામલે શિક્ષણ મંત્રી ધર્મેન્દ્ર પ્રધાનના રાજીનામાની માંગ સાથે વ્યાપક વિરોધ પ્રદર્શન શરૂ કર્યું છે. મલ્લિકાર્જુન ખડગે, રાહુલ ગાંધી અને પ્રિયંકા ગાંધી સહિતના અગ્રણી નેતાઓએ સંસદથી લઈને 7 લોક કલ્યાણ માર્ગ સ્થિત વડાપ્રધાનના નિવાસસ્થાન સુધી કૂચ કરી હતી. આ નેતાઓ શરૂઆતમાં રાજાજી માર્ગ પર એકત્ર થયા હતા. સૂત્રોચ્ચાર કર્યા બાદ અનેક નેતાઓની અટકાયત કરવામાં આવી હતી.
કોંગ્રેસ નેતા રાહુલ ગાંધીએ દેશના લોકોને વડાપ્રધાનના નિવાસસ્થાનની બહાર યોજાનારા વિરોધ પ્રદર્શનમાં જોડાવા અપીલ કરી છે. તેમણે કહ્યું કે આપણા વિદ્યાર્થીઓ ન્યાયને પાત્ર છે અને તેમના પરનો હુમલો એ દરેક ભારતીય પરિવાર પરનો હુમલો છે. તેમણે કેન્દ્રીય મંત્રી જિતેન્દ્ર સિંહની વિરોધ પ્રદર્શન પાછું ખેંચવાની માંગને ફગાવી દીધી અને તેને ચાલુ રાખવાનો નિર્ણય કર્યો.
અમે અમારો વિરોધ પાછો નહીં ખેંચીએ: નાસિર હુસૈન
કોંગ્રેસના સાંસદ સૈયદ નાસિર હુસૈને કહ્યું, “તેઓ (જિતેન્દ્ર સિંહ) ઈચ્છતા હતા કે અમે અમારો વિરોધ પાછો ખેંચી લઈએ, પરંતુ અમે તેમ ન કર્યું કારણ કે અમારી માંગણીઓ સંતોષાઈ ન હતી. અમે ઈચ્છીએ છીએ કે શિક્ષણ મંત્રી ધર્મેન્દ્ર પ્રધાન રાજીનામું આપે અને પેપર લીકના મુદ્દે સંસદમાં ચર્ચા થાય. અમારા વિરોધમાં વધુ સાંસદો, કોંગ્રેસના કાર્યકરો અને સામાન્ય જનતાના સભ્યો જોડાશે.”
કોંગ્રેસ નેતા જયરામ રમેશે જણાવ્યું હતું કે જ્યાં સુધી તેમની માંગણીઓ સ્વીકારવામાં નહીં આવે ત્યાં સુધી તેઓ વિરોધ સ્થળ છોડશે નહીં અને રાતભર ત્યાં જ રહેશે. કોંગ્રેસે સરકાર સમક્ષ ત્રણ માંગણીઓ રજૂ કરી છે. દરમિયાન, રાહુલ ગાંધીએ દેશના લોકોને આ વિરોધ પ્રદર્શનમાં જોડાવા માટે આહ્વાન કર્યું છે; તેમણે ભારપૂર્વક કહ્યું છે કે વિદ્યાર્થીઓને ન્યાય મળવો જોઈએ અને વિદ્યાર્થીઓ પરનો હુમલો એ દરેક ભારતીય પરિવાર પરનો હુમલો છે.
જીતેન્દ્ર સિંહે રાહુલ ગાંધી સાથે વાત કરી
વડાપ્રધાનના નિવાસસ્થાન નજીક ધરણાં કરી રહેલા રાહુલ ગાંધીને મળવા માટે કેન્દ્રીય મંત્રી જિતેન્દ્ર સિંહ પહોંચ્યા છે અને હાલ તેમની સાથે વાતચીત કરી રહ્યા છે. દરમિયાન, પોલીસે કન્હૈયા કુમાર, ચરણજીત સિંહ ચન્ની અને કે. સુરેશ સહિત કોંગ્રેસના અનેક નેતાઓની અટકાયત કરી છે.
અગાઉ, કોંગ્રેસ અધ્યક્ષ મલ્લિકાર્જુન ખડગે, લોકસભામાં વિપક્ષના નેતા રાહુલ ગાંધી, પ્રિયંકા ગાંધી વાડ્રા, કે.સી. વેણુગોપાલ અને પવન ખેડા સહિતના અનેક વરિષ્ઠ નેતાઓએ લોક કલ્યાણ માર્ગ પર આવેલા વડાપ્રધાનના નિવાસસ્થાન નજીક વિરોધ પ્રદર્શન કર્યું હતું. તેમણે યુવા વિદ્યાર્થીઓ પર કથિત અત્યાચારોના મુદ્દે વડાપ્રધાન નરેન્દ્ર મોદી અને શિક્ષણ મંત્રી ધર્મેન્દ્ર પ્રધાનના રાજીનામાની માંગ કરી હતી. દરમિયાન, સૂત્રોચ્ચાર કરી રહેલા કોંગ્રેસ કાર્યકરોની પોલીસે અટકાયત કરી હતી.
રાહુલ ગાંધીએ X પર પોસ્ટ કર્યું
રાહુલ ગાંધીએ એક ટ્વીટમાં કહ્યું, “ગઈકાલે વિદ્યાર્થીઓ પર થયેલા અત્યાચારો અંગે જવાબ મેળવવા માટે અમે વડાપ્રધાન મોદીના નિવાસસ્થાને કૂચ કરી છે. સરકાર ન તો જવાબદારી સ્વીકારવા માંગે છે કે ન તો સંસદમાં આ મુદ્દે ચર્ચા કરવા માંગે છે.” તેમણે વડાપ્રધાન અને ગૃહમંત્રીના રાજીનામાની માંગણી કરતા કહ્યું કે સરકાર ભારતના યુવાનોનું ભવિષ્ય બરબાદ કરી રહી છે.
