દેશમાં રિટેલ ફુગાવો મે મહિનામાં થોડો ઘટીને 7.04 ટકા રહ્યો જયારે એપ્રિલમાં 7.79 ટકા હતો
- મે મહિનામાં મોંઘવારીમાંથી થોડી રાહત!
- રિટેલ ફુગાવો ઘટીને 7.04% થયો
- એપ્રિલ 2022માં 7.79 ટકા હતો
દિલ્હી:દેશમાં રિટેલ ફુગાવો મે મહિનામાં થોડો ઘટીને 7.04 ટકા થયો હતો.જે એપ્રિલ 2022માં 7.79 ટકા હતો.જો કે, સાત ટકાની છૂટક મોંઘવારી સામાન્ય માણસના ખિસ્સા પર પણ અસર કરી રહી છે.પેટ્રોલ અને ડીઝલના ભાવની સાથે ખાદ્ય ચીજવસ્તુઓ, દૂધ અને પરિવહનના વધતા ખર્ચે સામાન્ય માણસ માટે મહિનાનો ખર્ચ વધારી દીધો છે.બીજી તરફ, રિઝર્વ બેંકે ફુગાવાને કાબૂમાં લેવા માટે એક મહિનાની અંદર વ્યાજ દરોમાં લગભગ એક ટકાનો વધારો કર્યો છે.તેનાથી હોમ લોન, પર્સનલ લોન અથવા વાહન લોન લેનારાઓની EMI પણ વધી છે.
એપ્રિલમાં ફુગાવો આઠ વર્ષની ટોચે પહોંચ્યો હતો.અગાઉ મે 2014માં ફુગાવો 8.33 ટકા હતો. એક વર્ષ પહેલાની વાત કરીએ તો રિટેલ ફુગાવો 4.23 ટકા હતો.કોરોના યુગના બે વર્ષમાં માંગમાં તીવ્ર ઘટાડો અને ઔદ્યોગિક ગતિવિધિઓમાં ઉથલપાથલ બાદ અર્થતંત્રમાં ફરી તેજી જોવા મળી રહી છે.આનાથી માંગ અને વપરાશમાં પણ વધારો થયો છે,પરંતુ રુસ-યુક્રેન યુદ્ધે વૈશ્વિક પુરવઠા શૃંખલાઓ વિક્ષેપિત કરી છે.જેના કારણે ક્રૂડ ઓઈલ, ખાદ્યતેલ અને કોમોડિટીના ભાવમાં મોટો ઉછાળો આવ્યો છે.
રિઝર્વ બેંકે ફુગાવાને કાબુમાં લેવા માટે બે વર્ષ બાદ વ્યાજદરમાં વધારો કરવાનું વલણ અપનાવ્યું છે. આરબીઆઈએ 4 ટકાના ફુગાવાના દરને સંતોષજનક અને 6 ટકાને મહત્તમ સહન કરી શકાય તેવા સ્તર તરીકે ગણ્યા છે, પરંતુ સતત પાંચમા મહિને ફુગાવો 6 ટકાથી ઉપર રહ્યો છે. કેન્દ્રીય બેંકે તેના અનુમાનમાં એમ પણ કહ્યું છે કે આ નાણાકીય વર્ષમાં ફુગાવો 2-6ના લક્ષ્યાંક બેન્ડથી ઉપર રહેશે. જો કે મોંઘવારી ઉચ્ચતમ સ્તર ક્યાં પહોંચશે તે કહેવું ઘણું વહેલું ગણાશે.
