ટીસીએસ કાંડની જેહાદી નિદા ખાન છેવટે ઝડપાઈ ગઈ, જાણો તેની ધરપકડના ઓપરેશન વિશે
મુંબઈ, 8 મે, 2026 – ટીસીએસ કાંડની જેહાદી નિદા ખાન છેવટે ઝડપાઈ ગઈ છે. મહારાષ્ટ્ર પોલીસે તેને એક વિશેષ ઓપરેશન કરીને ગઈકાલે ગુરુવારે રાત્રે ઝડપી પાડી હતી. IT ક્ષેત્રની દિગ્ગજ કંપની ટાટા કન્સલ્ટન્સી સર્વિસીસ (TCS) ના નાસિક યુનિટમાં બળજબરીપૂર્વક ધર્મ પરિવર્તન કરાવવાનો આરોપ નિદા ખાન પર છે, જે તપાસ દરમિયાન અનેક કેસ નોંધાયા બાદ ફરાર હતી.
પોલીસના જણાવ્યા અનુસાર નિદા ખાન છેલ્લા ચાર દિવસથી છત્રપતિ સંભાજીનગરના નરેગાંવ વિસ્તારમાં આવેલી કૈસર કોલોનીના એક ફ્લેટમાં તેનાં માતા-પિતા, ભાઈ અને માસી સાથે રહેતી હતી. પોલીસે જણાવ્યું હતું કે ઓપરેશન હાથ ધરતા પહેલા છેલ્લા બે દિવસથી આ ફ્લેટ પર નજર રાખવામાં આવી હતી.
આ પણ વાંચોઃ ડૉ. બાબાસાહેબ આંબેડકર ઓપન યુનિવર્સિટીનો અગિયારમો વાર્ષિક પદવીદાન સમારંભ યોજાયો
આ ધરપકડ નાસિક SIT, છત્રપતિ સંભાજીનગર પોલીસ કમિશનરેટ અને ક્રાઈમ બ્રાન્ચ દ્વારા સંયુક્ત રીતે કરવામાં આવી હતી. એક સત્તાવાર નિવેદનમાં SITએ જણાવ્યું કે, “દેવલાલી કેમ્પ પોલીસ સ્ટેશનના ગુના રજિસ્ટર નંબર 156/26 માં વોન્ટેડ આરોપી નિદા ખાનને છત્રપતિ સંભાજીનગરથી કસ્ટડીમાં લેવામાં આવી છે. BNSSની કલમ 43(5) મુજબ, તેને ટ્રાન્ઝિટ રિમાન્ડની કાર્યવાહી માટે છત્રપતિ સંભાજીનગરના જ્યુડિશિયલ મેજિસ્ટ્રેટ ફર્સ્ટ ક્લાસ સમક્ષ રજૂ કરવામાં આવી રહી છે.”
તેની અટકાયત બાદ નિદાને ન્યાયાધીશના નિવાસસ્થાને જ્યુડિશિયલ મેજિસ્ટ્રેટ ફર્સ્ટ ક્લાસ (JMFC) સમક્ષ રજૂ કરવામાં આવી હતી, જ્યાં પોલીસે ટ્રાન્ઝિટ રિમાન્ડ મેળવ્યા હતા. ત્યારબાદ તેને વધુ પૂછપરછ અને કાનૂની કાર્યવાહી માટે નાસિક લઈ જવામાં આવી હતી.
નિદાએ અગાઉ નાસિકની કોર્ટમાં આગોતરા જામીન અને ધરપકડ સામે વચગાળાના રક્ષણની માંગ કરી હતી, જેમાં તેણે તેની બે મહિનાની ગર્ભાવસ્થાનો ઉલ્લેખ કર્યો હતો. જોકે, કોર્ટે તેને વચગાળાની રાહત આપવાનો ઇનકાર કર્યો હતો.
આ પણ વાંચોઃ GCCI બિઝનેસ વુમન કમિટી દ્વારા “ધ વેલનેસ કન્વર્સેશન” વિષયક સત્રનું આયોજન
ખાન ડિસેમ્બર 2021 માં કંપનીમાં જોડાઈ હતી અને ‘પ્રોસેસ એસોસિએટ’ તરીકે કામ કરતી હતી. આ આરોપો બાદ તેને સસ્પેન્ડ કરવામાં આવી હતી. 9 એપ્રિલના પત્રમાં જણાવવામાં આવ્યું હતું કે, “તમને જાણ કરવામાં આવે છે કે કંપનીને તમારી વિરુદ્ધ નોંધાયેલી ગંભીર બાબતની જાણ કરવામાં આવી છે, જેના અનુસંધાનમાં તમે હાલમાં જ્યુડિશિયલ/પોલીસ કસ્ટડીમાં છો. મામલાની ગંભીરતાને ધ્યાનમાં લેતા અને તમે હાલમાં તમારી સત્તાવાર ફરજો નિભાવવા અસમર્થ હોવાથી, કંપનીએ મેનેજમેન્ટ દ્વારા આ બાબતે આગળની વાતચીત અને નિર્ણય ન લેવાય ત્યાં સુધી તમને તાત્કાલિક અસરથી સસ્પેન્ડ કરવાનો નિર્ણય લીધો છે.”
કંપનીએ તેને એમ પણ જણાવ્યું હતું કે આગળની કાર્યવાહી બાકી હોવાથી તેની આંતરિક સિસ્ટમ્સ અને નેટવર્કની એક્સેસ કામચલાઉ ધોરણે રદ કરવામાં આવી છે. આ વિવાદ જાહેરમાં આવ્યો તે પહેલા નિદા ખાનને લગભગ ત્રણ મહિના પહેલા નાસિક યુનિટથી મુંબઈમાં મલાડ અને હિરાનંદાની ખાતેની કંપનીની ઓફિસોમાં ટ્રાન્સફર કરવામાં આવી હોવાના અહેવાલ છે.
TCS ‘ધર્માંતરણ‘ અને જાતીય સતામણીનો કેસ
આ ઘટના ત્યારે પ્રકાશમાં આવી જ્યારે TCS નાસિક બ્રાન્ચમાં કામ કરતી એક મહિલાએ સહકર્મી દાનિશ શેખ પર આરોપ લગાવ્યો કે તેણે 2022 માં લગ્નની ખોટી ખાતરી આપી તેની સાથે શારીરિક સંબંધ બાંધ્યા હતા, જ્યારે તે પહેલેથી જ બીજી મહિલા સાથે પરણેલો હતો. પોલીસ રિપોર્ટ અનુસાર નિદા ખાન દાનિશ શેખની બહેન છે. રિપોર્ટમાં જણાવ્યા મુજબ, તેણે ફરિયાદીની હિન્દુ આસ્થા વિશે અપમાનજનક ટિપ્પણી કરી હતી અને તેના પર ધર્મ પરિવર્તન કરવા દબાણ કરવાનો પ્રયાસ કર્યો હતો. વધુમાં એવો પણ આરોપ છે કે ખાન અને અન્ય એક વ્યક્તિ તૌસીફ અખ્તરે ફરિયાદીથી એ વાત છુપાવી હતી કે દાનિશ શેખ પહેલેથી જ પરણેલો છે.
પોલીસે આ મામલે તપાસ શરૂ કરતા અન્ય સાત મહિલાઓ આગળ આવી હતી, જેમણે દાવો કર્યો હતો કે તેમના વરિષ્ઠ સહકર્મીઓએ તેમનું માનસિક અને જાતીય શોષણ કર્યું હતું અને માનવ સંસાધન (HR) વિભાગે તેમની ફરિયાદોની અવગણના કરી હતી. આ ઘટનાઓ કથિત રીતે ફેબ્રુઆરી 2022 થી માર્ચ 2026 વચ્ચે બની હતી. પોલીસે સાત કર્મચારીઓની ધરપકડ કરી છે, જેમાં છ પુરુષો અને એક મહિલા (HR હેડ) નો સમાવેશ થાય છે.
ટીસીએસની સ્પષ્ટતા
આ બાબત પ્રકાશમાં આવ્યા પછી, TCS એ X પર એક સત્તાવાર નિવેદન જાહેર કર્યું – જેમાં સ્પષ્ટતા કરવામાં આવી કે નિદા ખાન ન તો HR મેનેજર છે અને ન તો ભરતી માટે જવાબદાર છે. તે પ્રોસેસ એસોસિએટ તરીકે સેવા આપી રહી હતી અને તેની પાસે કોઈ નેતૃત્વની જવાબદારીઓ નહોતી. કંપનીએ એમ પણ જણાવ્યું હતું કે તેને આ બાબતે તેની આંતરિક ચેનલો દ્વારા કોઈ ફરિયાદો મળી નથી.
