શ્રીનગર, 30 સપ્ટેમ્બર 2026: જમ્મુ-કાશ્મીરના બડગામ જિલ્લામાં સર્ચ ઓપરેશન દરમિયાન સુરક્ષા દળોએ લશ્કર-એ-તૈયબાના આતંકવાદી મોહમ્મદ આસિફ, ઉર્ફે હાશિમ મુસાનો મૃતદેહ કબજે કર્યો હતો. શ્રીનગર સ્થિત ચિનાર કોર્પ્સે મુસાના મૃત્યુની પુષ્ટિ કરી હતી.
ચિનાર કોર્પ્સે ‘X’ પ્લેટફોર્મ પર જણાવ્યું હતું કે, “પાલમાઇદાન વિસ્તારમાં સવારના સર્ચ ઓપરેશન દરમિયાન, પાકિસ્તાન સ્થિત લશ્કર-એ-તૈયબા (LeT)ના આતંકવાદી મોહમ્મદ આસિફ (ઉર્ફે હાશિમ મુસા)નો મૃતદેહ અને યુદ્ધ-સામગ્રી મળી આવ્યા હતા.”
સેનાએ ‘ઓપરેશન કોરાગ’ શરૂ કર્યું
ચોક્કસ ગુપ્ત માહિતીના આધારે, સેના અને અન્ય સુરક્ષા એજન્સીઓએ મંગળવારે મોડી રાત્રે યુસમર્ગ વિસ્તારમાં ‘ઓપરેશન કોરાગ’ (OP KORAG) શરૂ કર્યું.
સજાગ સૈનિકોએ શંકાસ્પદ હિલચાલ જોઈને તે વ્યક્તિઓને પડકાર્યા; આતંકવાદીઓએ ગોળીબાર શરૂ કર્યો, જેના પરિણામે બંને પક્ષો વચ્ચે ભારે ગોળીબાર થયો અને તેમાં હાશિમ મુસા માર્યો ગયો. સુરક્ષા દળો તરફથી મળેલી માહિતી મુજબ, અભિયાન ચાલુ રહ્યું અને સૈનિકોએ તે વિસ્તારમાં શોધખોળની કામગીરી જારી રાખી.
પહલગામ આતંકવાદી હુમલામાં નામ સામે આવ્યું હતું
જોકે, સમાચાર એજન્સી ANI અનુસાર, એવો દાવો કરવામાં આવ્યો છે કે 2025ના પહેલગામ હુમલામાં સામેલ મુખ્ય શંકાસ્પદોમાં હાશિમ મુસાનું નામ સામે આવ્યું હતું. પહેલગામ હુમલામાં એક સ્થાનિક યુવક સહિત 26લોકો માર્યા ગયા હતા.
આ આતંકવાદી હુમલા બાદ, જમ્મુ-કાશ્મીર પોલીસે પાકિસ્તાની નાગરિકો અને લશ્કર-એ-તૈયબાના આતંકવાદીઓ – આદિલ હુસૈન થોકર, અલી ભાઈ અને હાશિમ મુસા – ની ધરપકડમાં મદદરૂપ થાય તેવી માહિતી આપનાર માટે 20 લાખના ઈનામની જાહેરાત કરી.
ANI અનુસાર, હાશિમ મુસાએ પાકિસ્તાનના ‘સ્પેશિયલ સર્વિસ ગ્રુપ’માં પેરા-કમાન્ડો તરીકે સેવા આપી હતી.
સાત આરોપીઓ સામે ચાર્જશીટ દાખલ કરવામાં આવી
નેશનલ ઇન્વેસ્ટિગેશન એજન્સી (NIA) એ પહેલગામ આતંકવાદી હુમલાના કેસમાં સાત આરોપીઓ સામે ચાર્જશીટ દાખલ કરી છે. આ ચાર્જશીટમાં લશ્કર-એ-તૈયબા (LeT) અને તેના સહયોગી સંગઠન ‘ધ રેઝિસ્ટન્સ ફ્રન્ટ’ (TRF) ની સંડોવણી દર્શાવવામાં આવી છે; આ બંને પ્રતિબંધિત આતંકવાદી સંગઠનો છે.
NIAએ પહેલગામ હુમલા પાછળના કાવતરામાં પાકિસ્તાનની ભૂમિકાની વિગતો આપી છે અને પ્રતિબંધિત સંગઠનો LeT તથા TRF પર આ હુમલાનું આયોજન, સુવિધા પૂરી પાડવા અને તેને અંજામ આપવામાં સામેલ હોવાનો ઔપચારિક આરોપ મૂક્યો છે. 1,597 પાનાંની ચાર્જશીટમાં પાકિસ્તાની હેન્ડલર અને આતંકવાદી સાજિદ જટનું નામ પણ આરોપી તરીકે સામેલ કરવામાં આવ્યું છે.
વધુ વાંચો: સુરતથી રાજસ્થાન જતી બસનો વડોદરા એક્સપ્રેસવે પર ટ્રક સાથે અકસ્માત, 5નાં મોત
