ઢાકા, 23 ઓગસ્ટ 2026: બાંગ્લાદેશના રંગપુર શહેરમાં એક ચોંકાવનારી ઘટના સામે આવી છે, જ્યાં નિવૃત્ત હિન્દુ શિક્ષક ગણપતિ ચક્રવર્તી તેમજ તેમની પત્ની, પુત્રી અને પુત્રના મૃતદેહો તેમના ઘરમાંથી મળી આવ્યા છે. પરિવાર સાથેનો સંપર્ક તૂટી ગયા બાદ, શનિવારે રાત્રે પોલીસે ઘરનું તાળું તોડીને અંદર પ્રવેશ કર્યો હતો અને ઘરના વિવિધ ભાગોમાંથી પરિવારના ચારેય સભ્યોના મૃતદેહો મળી આવ્યા હતા.
પોલીસ અને સીઆઈડીની ટીમોએ ઘટનાસ્થળને સીલ કરી દીધું છે અને આ મામલે ઝીણવટભરી તપાસ શરૂ કરી છે.
આખી વાત શું છે?
‘ધ ડેઈલી સ્ટાર’ના અહેવાલ મુજબ, રંગપુર મેટ્રોપોલિટન કોતવાલી પોલીસ સ્ટેશનના અધિકારી નજમુલ કાદરે જણાવ્યું હતું કે, પોલીસે શનિવારે રાત્રે ઘરનું તાળું તોડીને ચાર વ્યક્તિઓના મૃતદેહો બહાર કાઢ્યા હતા.
મૃતકોની ઓળખ રંગપુર ડિસ્ટ્રિક્ટ સ્કૂલના નિવૃત્ત શિક્ષક ગણપતિ ચક્રવર્તી (65), તેમના પત્ની પ્રીતિલતા ચક્રવર્તી (50), તેમની પુત્રી આગામી ચક્રવર્તી પ્રાર્થી (23) અને તેમના પુત્ર પ્રિયમ ચક્રવર્તી (12) તરીકે કરવામાં આવી છે. પોલીસે કેસ નોંધીને તપાસ શરૂ કરી છે.
ગણપતિ 31 ડિસેમ્બરે રંગપુર જિલ્લા શાળામાંથી નિવૃત્ત થયા. તેમની પુત્રી આગામીએ આ વર્ષે રંગપુર કાર્માઈકલ કોલેજમાંથી અંગ્રેજીમાં માસ્ટર્સની ડિગ્રી મેળવી, જ્યારે તેમનો પુત્ર પ્રિયમ રંગપુર જિલ્લા શાળામાં પાંચમા ધોરણનો વિદ્યાર્થી હતો.
ગુરુવાર બપોરથી બધાના બંધ હતા ફોન
ગણપતિના પરિવારજનોએ જણાવ્યું હતું કે ઘરના સભ્યો સાથેનો સંપર્ક તૂટી જતાં તેમને ચિંતા થવા લાગી હતી. તેમણે છેલ્લે ગુરુવારે બપોરે પરિવાર સાથે વાત કરી હતી; ત્યારથી તેમના તમામ મોબાઈલ ફોન બંધ હતા.
પરિવારના એક સભ્યએ કહ્યું, “શનિવારે રાત્રે તેમના ફોન બંધ હોવાનું જણાતાં અમે દાસપારા ગયા હતા. મુખ્ય દરવાજો બંધ હતો અને અંદરની તમામ લાઈટો બંધ હતી. બાદમાં પોલીસ આવી અને ઘરમાં પ્રવેશવા માટે તાળું તોડ્યું, જ્યાં તેમને મૃતદેહો મળી આવ્યા.”
હાલમાં, પરિવારના સભ્યો એ સમજી શકતા નથી કે પરિવારના ચાર સભ્યોની હત્યા કોણે કરી હશે અથવા તેની પાછળનો હેતુ શું હોઈ શકે.
ગણપતિની ભાભીએ કહ્યું, “મને સમજાતું નથી કે મારી બહેન અને તેના આખા પરિવારની હત્યા કોણે કરી, અથવા આવું શા માટે અને ક્યારે બન્યું. મારી બહેનના પતિ ખૂબ સારા માણસ હતા. તેમને કોઈ દુશ્મન નહોતા. તેમણે દાસપારામાં નવું ઘર બનાવ્યું હતું અને ત્યાં રહેતા હતા.”
વધુ વાંચો: ટ્રમ્પે હોર્મુઝને અમેરિકાનો હિસ્સો ગણાવ્યું, નકશો શેર કર્યો
