બેંગલુરુમાં આકાર લેશે દેશની પ્રથમ AI સિટી, જાણો સંપૂર્ણ પ્રોજેક્ટ અંગે
બેંગલુરુ, 17 ફેબ્રુઆરી 2026: ટેક સિટી બેંગલુરુ ફરી એકવાર વૈશ્વિક ફલક પર ચમકવા જઈ રહ્યું છે. બેંગલુરુ સ્થિત AI ઇન્ફ્રાસ્ટ્રક્ચર કંપની ભારત1.AI એ મંગળવારે દેશની પ્રથમ હ્યુમેનિટી-ફર્સ્ટ AI સિટી સ્થાપવાની મહત્વાકાંક્ષી જાહેરાત કરી છે. આ પ્રોજેક્ટનો મુખ્ય ઉદ્દેશ્ય AI મોડલ ટ્રેનિંગ, ફાઈન-ટ્યુનિંગ અને ઇન્ફરન્સ માટે એક વિશાળ પ્લેટફોર્મ પૂરું પાડવાનો છે. આ યોજના અંતર્ગત બેંગલુરુના સરજાપુર વિસ્તારમાં 5 લાખ ચોરસ ફૂટમાં ફેલાયેલું ‘B1 AI સુપરપાર્ક’ બનાવવામાં આવશે. આ કેમ્પસ આધુનિક AI સંશોધન અને ઇનોવેશનનું કેન્દ્ર બનશે.
અહીં 400 GBPS સુધીની હાઈ-સ્પીડ કનેક્ટિવિટી મળશે. ક્લાઉડ પ્લેટફોર્મ સાથે સબ-મિલિસેકન્ડ લેટન્સી સુવિધા મળશે, જેથી ડેટા પ્રોસેસિંગમાં કોઈ અવરોધ નહીં આવે. આ વર્ષના અંત સુધીમાં અહીં 10,000 થી વધુ AI સંશોધકો અને ઇનોવેટર્સ કાર્યરત થાય તેવું લક્ષ્ય છે. ભારતની પ્રતિષ્ઠિત સંસ્થાઓ આ પ્રોજેક્ટમાં રિસર્ચ પાર્ટનર તરીકે જોડાશે, જેમાં મુખ્યત્વે IIT કાનપુર (ઐરાવત રિસર્ચ ફાઉન્ડેશન અને વધવાણી સ્કૂલ ઓફ AI), IISc (સેફ્ટી, પ્રાઈવસી એન્ડ AI રિસર્ચ સેન્ટર – SPARC), BITS પિલાણી, iSPIRT ફાઉન્ડેશન અને IIT રોપડનો સમાવેશ થાય છે.
ભારત1.AI ના સહ-સંસ્થાપક અને CEO ઉમાકાંત સોનીએ જણાવ્યું હતું કે, “વાસ્તવિક દુનિયાના જટિલ વાતાવરણમાં પરીક્ષણ કર્યા વિના AI સિસ્ટમને મોટા પાયે લાગુ કરવી જોખમી હોઈ શકે છે. અમારો હેતુ સુરક્ષિત, વિશ્વાસપાત્ર અને માનવ મૂલ્યોને અનુરૂપ AI સિસ્ટમ તૈયાર કરવાનો છે.”
બીજી તરફ, ગ્લોબલ સાઉથની સૌથી મોટી AI કોન્ફરન્સ ‘ઇન્ડિયા AI ઇમ્પેક્ટ સમિટ 2026’ તેના બીજા દિવસમાં પ્રવેશી છે. 20 ફેબ્રુઆરી સુધી ચાલનારા આ પાંચ દિવસીય સંમેલનમાં 20થી વધુ રાષ્ટ્રાધ્યક્ષો, 60 મંત્રીઓ અને 500થી વધુ વૈશ્વિક AI નિષ્ણાતો ભાગ લઈ રહ્યા છે. આગામી 36 મહિનામાં આ સુપરપાર્ક એક સંપૂર્ણ ‘AI સિટી ટેસ્ટબેડ’માં પરિવર્તિત થશે, જે વૈશ્વિક સંગઠનોને શહેરી સ્તરે AI સિસ્ટમ્સના પરીક્ષણ માટે પ્લેટફોર્મ પૂરું પાડશે.
