ગુજરાત વિધાનસભાની ચૂંટણીના ઉમેદવારોની પ્રથમ યાદી કોંગ્રેસ દ્વારા દિવાળી બાદ જાહેર કરાશે

અમદાવાદઃ ગુજરાતમાં વિધાનસભાની ચૂંટણીને હવે એકાદ મહિના જેટલો સમય બાકી રહ્યો છે. ત્યારે આમ આદમી પાર્ટીએ કુલ 73 ઉમેદવારોની  યાદી જાહેર કરી દીધી છે. અને ભાજપ તથા કોંગ્રેસે ઉમેદવારોની પસંદગી માટે કવાયત શરૂ કરી દીધી છે. કોંગ્રેસ દ્વારા  ઉમેદવારોની પસંદગી માટે દિલ્હીમાં ત્રણ દિવસ સ્ક્રિનિંગ કમિટીની બેઠક મળી હતી. આ બેઠક ગઈ શુક્રવારે પુરી થઈ હતી. હવે કોંગ્રેસની કેન્દ્રીય ચૂંટણી સમિતીની બેઠક યોજાશે. જેમાં ઉમેદવારોની ફાઈનલ યાદી અંગે ચર્ચાઓ થશે. ત્યાર બાદ દિવાળી પછી ઉમેદવારોની પહેલી યાદી જાહેર કરાશે

સૂત્રોના જણાવ્યા મુજબ ગુજરાતની 182 બેઠકો માટે કોંગ્રેસ પાસે 900 જેટલા દાવેદારોએ ચૂંટણી લડવા માટે ઈચ્છા દર્શાવી છે. પ્રદેશ કક્ષાએ વિવિધ માપદંડોના આધારે સ્ક્રૂટિની કરાયા બાદ એકથી ચાર દાવેદારોના નામ સાથેની પેનલ સ્ક્રિનિંગ કમિટીને મોકલવામાં આવી હતી. કોંગ્રેસના સિનિયર નેતા રમેશ ચેન્નીથલાને સ્ક્રિનિંગ કમિટીના અધ્યક્ષ બનાવવામાં આવ્યાં છે. તેમના અધ્યક્ષ સ્થાને 19થી 21 ઓક્ટોબર સુધી ત્રણ દિવસ સ્ક્રિનિંગ કમિટીની બેઠક મળી હતી. આ બેઠકમાં 65 જેટલા નામ ફાઈનલ કરવામાં આવ્યા હોવાનું કહેવાય છે. સ્ક્રિનિંગ કમિટીની ત્રણ દિવસની બેઠકમાં તમામ 182 બેઠકો માટે ચર્ચા થઇ હતી. બેઠક પ્રમાણેની નામોની પેનલ તૈયાર કરવામાં આવી હતી. હવે કોંગ્રેસનાં નવનિયુક્ત અધ્યક્ષ મલ્લીકાર્જુન ખડગેના વડપણ હેઠળ કેન્દ્રીય ચૂંટણી સમિતિની બેઠક યોજાશે અને તેમાં ઉમેદવારોના નામો ફાઈનલ કરવામાં આવશે. ઓકટોબર માસના અંત સુધીમાં કોંગ્રેસ પોતાના નામની પહેલી યાદી જાહેર કરી શકે છે.

સુત્રોએ ઉમેર્યું હતું કે, કોંગ્રેસના મોટાભાગના વર્તમાન ધારાસભ્યોને રિપીટ કરવામાં આવશે. ત્યારે પ્રથમ યાદીમાં આ વર્તમાન ધારાસભ્યોના નામ જાહેર કરવામાં આવશે. ચૂંટણી પહેલા આમ આદમી પાર્ટીએ ઉમેદવાર જાહેર કર્યા છે ત્યારે કોંગ્રેસ પણ ચૂંટણી જાહેર થવા પહેલા ઉમેદવાર જાહેર કરવાની હોડમાં હતી. પરંતુ હવે કોંગ્રેસ દરેક ડગલું ફૂંકી ફૂંકીને ભરી રહી છે. ચૂંટણી દરમિયાન કોઈ ધારાસભ્યો કે અન્ય નેતાઓની નારાજગી સામે ના આવે તે માટે સાવધાનીપૂર્વક ઉમેદવાર પસંદ કરવાના મૂડમાં છે. તાજેતરમાં જ કોંગ્રેસના એક ધારાસભ્યએ રાજીનામું આપી દીધું હતું.