નવી દિલ્હીઃ યુએસ ઈન્ટેલિજન્સ સર્વિસના ડાયરેક્ટર કિમ્બર્લી ચીટલે મંગળવારે ભૂતપૂર્વ યુએસ પ્રમુખ ડોનાલ્ડ ટ્રમ્પ પર ઘાતક હુમલામાં પોતાની ભૂલ સ્વીકારીને પોતાના પદ પરથી રાજીનામું આપી દીધું હતું. ઈન્ટેલિજન્સ સર્વિસના ભૂતપૂર્વ વડા ચીટલે વિભાગના સહકર્મીઓને ઈ-મેલમાં આ માહિતી આપી હતી. “હું સુરક્ષા ક્ષતિ માટે સંપૂર્ણ જવાબદારી લઉં છું,” ચીટલે મંગળવારે એક ઇમેઇલમાં જણાવ્યું હતું. “તાજેતરની ઘટનાઓને ધ્યાનમાં રાખીને ભારે હૃદય સાથે મેં ડિરેક્ટરના પદ પરથી રાજીનામું આપવાનો મુશ્કેલ નિર્ણય લીધો છે.”
ટ્રમ્પ પર હુમલાની ઘટના બાદથી ગુપ્તચર સેવા ગંભીર ક્ષતિઓના આરોપોનો સામનો કરી રહી હતી. આ કારણે ઓગસ્ટ 2022થી ડિરેક્ટર પદ સંભાળી રહેલા ચીટલે પર રાજીનામું આપવાનું ભારે દબાણ હતું. એક દિવસ અગાઉ ચીટલે ધારાશાસ્ત્રીઓ સમક્ષ કબૂલ્યું હતું કે ભૂતપૂર્વ પ્રમુખ ટ્રમ્પની હત્યાનો પ્રયાસ 1981માં તત્કાલિન રાષ્ટ્રપતિ રોનાલ્ડ રીગનની ગોળીબાર પછીની “સૌથી ગંભીર” સુરક્ષા ખામી હતી.
ટ્રમ્પ હત્યાના પ્રયાસ અંગે હાઉસ ઓવરસાઇટ એન્ડ એકાઉન્ટેબિલિટી કમિટી સમક્ષ તેમની હાજરી દરમિયાન ચીટલે આ કબૂલાત કરી હતી, જેમાં તેમને બે ભારતીય-અમેરિકન સંસદ સભ્યો રાજા કૃષ્ણમૂર્તિ અને રો ખન્ના સહિત વિવિધ ધારાશાસ્ત્રીઓ દ્વારા પૂછપરછ કરવામાં આવી હતી. ચીટલે કહ્યું કે તેમની એજન્સી 13 જુલાઈના હત્યાના પ્રયાસમાં ભૂતપૂર્વ રાષ્ટ્રપતિ ડોનાલ્ડ ટ્રમ્પને બચાવવાના તેના મિશનમાં નિષ્ફળ ગઈ.
