આ છે દુનિયાના સૌથી હેલ્ધી 5 દેશ, ગ્લોબલ હેલ્થ ઇન્ડેક્સમાં ભારત કયા ક્રમે?

જો તમે વિદેશમાં સ્થાયી થવાનું વિચારી રહ્યા છો અને એવી જગ્યા શોધી રહ્યા છો જ્યાં ઉત્તમ સ્વાસ્થ્ય સુવિધાઓ, પ્રદૂષણ મુક્ત વાતાવરણ અને મજબૂત હેલ્થકેર સિસ્ટમ હોય, તો તાજેતરમાં જાહેર થયેલો ‘ગ્લોબલ હેલ્થ ઇન્ડેક્સ 2025’ તમારા માટે ખૂબ જ ઉપયોગી સાબિત થઈ શકે છે. આ રિપોર્ટમાં એવા દેશોનું રેન્કિંગ કરવામાં આવ્યું છે જ્યાં લોકો લાંબુ આયુષ્ય ભોગવે છે, હવા-પાણી શુદ્ધ છે અને હેલ્ધી લાઈફસ્ટાઈલ જીવવાની તકો વધુ છે. ચાલો જાણીએ દુનિયાના ટોચના 5 હેલ્ધી દેશો અને તેમાં ભારત-પાકિસ્તાનની સ્થિતિ વિશે.

• નોર્વે

નોર્વે આ વર્ષે વિશ્વનો સૌથી હેલ્ધી દેશ જાહેર થયો છે. અહીં સરેરાશ આયુષ્ય 83.46 વર્ષ છે. નોર્વેની રાજધાની ઓસ્લો યુરોપના સૌથી હરિયાળા શહેરોમાંનું એક છે. અહીંની સ્વચ્છ હવા, શ્રેષ્ઠ પર્યાવરણ અને મજબૂત હેલ્થ સિસ્ટમ તેને નંબર-1 બનાવે છે. અહીંના લોકો સાયકલિંગ અને આઉટડોર એક્ટિવિટીઝને પ્રાધાન્ય આપે છે.

• સ્વિટ્ઝરલેન્ડ

બીજા ક્રમે રહેલા સ્વિટ્ઝરલેન્ડમાં સરેરાશ આયુષ્ય 84 વર્ષથી વધુ છે. અહીંની ‘ફરજિયાત હેલ્થ ઈન્શ્યોરન્સ’ સિસ્ટમ દરેક નાગરિકને પાયાની સ્વાસ્થ્ય સુવિધાઓની ખાતરી આપે છે. પ્રતિ વ્યક્તિ ડોક્ટરો અને નર્સની સંખ્યા અહીં વિશ્વમાં સૌથી વધુ પૈકીની એક છે.

• ફિનલેન્ડ

ફિનલેન્ડ યાદીમાં ત્રીજા સ્થાને છે. કુદરતી હરિયાળી અને શુદ્ધ હવાની ગુણવત્તામાં ફિનલેન્ડ અન્ય દેશો કરતા ઘણું આગળ છે. જોકે, અહીં આલ્કોહોલ જેવી કેટલીક સમસ્યાઓ છે, પરંતુ સરકારની જાગૃતિ ઝુંબેશને કારણે સ્વાસ્થ્યના માપદંડોમાં સતત સુધારો થઈ રહ્યો છે.

• ઓસ્ટ્રેલિયા

ઓસ્ટ્રેલિયામાં સરેરાશ આયુષ્ય 84 વર્ષ ની આસપાસ છે. અહીંની ‘મેડિકેર’ સિસ્ટમ નાગરિકોને સસ્તી અને ગુણવત્તાયુક્ત સારવાર પૂરી પાડે છે. ઓસ્ટ્રેલિયાના લોકો સક્રિય જીવનશૈલી અને આઉટડોર સ્પોર્ટ્સ માટે જાણીતા છે.

• સ્વીડન

પાંચમાં ક્રમે સ્વીડન આવે છે. અહીં ‘યુનિવર્સલ હેલ્થકેર સિસ્ટમ’ અમલમાં છે અને સરકાર તેના જીડીપીનો મોટો હિસ્સો સ્વાસ્થ્ય પાછળ ખર્ચે છે. અહીંનું વાતાવરણ અત્યંત સ્વચ્છ છે જે લોકોને નિરોગી રાખવામાં મદદ કરે છે.

• ભારત

ગ્લોબલ હેલ્થ ઇન્ડેક્સના રિપોર્ટ અનુસાર, ભારત અને પાકિસ્તાન ટોપ-10 કે ટોપ-20 દેશોની યાદીમાં સ્થાન મેળવી શક્યા નથી. વિકસિત દેશોની સરખામણીએ ભારત અને પાકિસ્તાન જેવી ઉભરતી અર્થવ્યવસ્થાઓએ હેલ્થ ઈન્ફ્રાસ્ટ્રક્ચર, પર્યાવરણની શુદ્ધતા અને આયુષ્યના દરમાં હજુ ઘણો સુધારો કરવાની જરૂર છે. બીજી તરફ, વર્ષ 2025 ના આંકડા મુજબ સોમાલિયા, ઉત્તર કોરિયા અને તિમોર-લેસ્તે જેવા દેશો લિસ્ટમાં સૌથી નીચે છે, જ્યાં પાયાની સ્વાસ્થ્ય સુવિધાઓનો પણ અભાવ છે.