બાળકોની નાની ભૂખ માટે બેસ્ટ છે આ દેશી સ્ટાઈલ મસાલા મેકરોની, જાણો રેસીપી

સાંજના 6 વાગે એટલે ઘરના દરેક ખૂણેથી એક જ અવાજ સંભળાય છે, “મમ્મી, બહુ ભૂખ લાગી છે, કંઈક ટેસ્ટી ખાવા આપને!” જ્યારે બાળકો ભૂખને કારણે જીદ કરે છે, ત્યારે મોટાભાગના વાલીઓ ઉતાવળમાં તેમને બિસ્કિટ, સમોસા કે બહારના મોમોઝ ખવડાવી દેતા હોય છે. આ વસ્તુઓ સ્વાદમાં તો સારી લાગે છે, પરંતુ દરરોજ ખાવાથી બાળકના સ્વાસ્થ્ય પર તેની ગંભીર અસર પડી શકે છે. આજની આ ખાસ રેસીપી એ દરેક માતાઓ માટે છે જે ઓછા સમયમાં કંઈક પૌષ્ટિક અને ચટપટું બનાવીને બાળકોને ખુશ કરવા માંગે છે. આજે આપણે જાણીશું ‘ચટપટી મસાલા મેકરોની’ બનાવવાની સૌથી સરળ રીત. દેશી મસાલા અને પાસ્તાનું આ મજેદાર કોમ્બો બાળકોનું ઓલ-ટાઇમ ફેવરિટ છે.

• મસાલા મેકરોની બનાવવા માટેની જરૂરી સામગ્રી

મેકરોની: 1 કપ
ડુંગળી: 1 (બારીક સમારેલી)
ટામેટા: 1 મોટું (ઝીણું સમારેલું અથવા પ્યુરી)
કેપ્સિકમ: 1/2 કપ (ઝીણું સમારેલું)
આદુ-લસણની પેસ્ટ: 1 નાની ચમચી
ટોમેટો કેચઅપ: 2 મોટી ચમચી
મસાલા: 1/4 ચમચી હળદર, 1/2 ચમચી લાલ મરચું, 1/4 ચમચી ગરમ મસાલો
મીઠું: સ્વાદ મુજબ
તેલ અથવા બટર: 2 મોટી ચમચી
લીલા ધાણા: ગાર્નિશિંગ માટે

• મસાલા મેકરોની બનાવવાની સરળ રીત

સૌ પ્રથમ એક ઊંડા વાસણમાં 3 થી 4 કપ પાણી ગરમ કરો. પાણી ઉકળવા લાગે એટલે તેમાં 1/2 ચમચી મીઠું અને 1 ચમચી તેલ ઉમેરો. તેલ નાખવાથી મેકરોની એકબીજા સાથે ચીપકશે નહીં. હવે તેમાં મેકરોની ઉમેરી મધ્યમ આંચ પર 8 થી 10 મિનિટ ચઢવા દો. મેકરોની સોફ્ટ થઈ જાય એટલે તેને ગાળી લો અને ઠંડા પાણીથી ધોઈ લો જેથી તે ઓવરકૂક ન થાય. એક કડાઈમાં 2 મોટી ચમચી તેલ અથવા બટર ગરમ કરો. તેમાં આદુ-લસણની પેસ્ટ અને બારીક સમારેલા મરચાં નાખી થોડી સેકન્ડ સાંતળો. હવે તેમાં ડુંગળી ઉમેરો અને ગુલાબી રંગની થાય ત્યાં સુધી શેકો. ત્યારબાદ તેમાં કેપ્સિકમ (અથવા બાળકોને ગમતા શાકભાજી જેવા કે ગાજર, મકાઈ) ઉમેરી 2 મિનિટ પકાવો. શાકભાજીનો ક્રંચ જળવાઈ રહેવો જોઈએ. હવે તેમાં ટામેટા ઉમેરી તેને નરમ થવા દો. ટામેટા ચઢી જાય એટલે હળદર, લાલ મરચું, ગરમ મસાલો અને મીઠું ઉમેરી બરાબર મિક્સ કરો. મસાલામાંથી તેલ છૂટું પડે એટલે તેમાં ટોમેટો કેચઅપ ઉમેરો. આ કેચઅપ મેકરોનીને ખાટો-મીઠો સ્વાદ આપશે. હવે બાફેલી મેકરોની ઉમેરી હળવા હાથે મિક્સ કરો જેથી તે તૂટી ન જાય. 2 મિનિટ ઢાંકીને ધીમી આંચ પર ચઢવા દો જેથી મસાલાનો ફ્લેવર અંદર સુધી ઉતરી જાય. છેલ્લે કોથમીર ભભરાવી ગરમા-ગરમ સર્વ કરો. જો તમારા બાળકને ચીઝ પસંદ હોય, તો પીરસતી વખતે ઉપરથી થોડું મોઝરેલા અથવા પ્રોસેસ્ડ ચીઝ છીણીને નાખો. આનાથી મેકરોનીનો સ્વાદ બમણો થઈ જશે!