ભારતમાં પબ્લિક વાઇ-ફાઇના વ્યાપને વધારવા TRAIની કવાયત
નવી દિલ્હી, 27 એપ્રિલ 2026: ટેલિકોમ રેગ્યુલેટરી ઓથોરિટી ઓફ ઈન્ડિયા (TRAI) એ આજે “ભારતમાં પબ્લિક વાઇ-ફાઇ નેટવર્કનો પ્રસાર” વિષય પર એક મહત્વપૂર્ણ પરામર્શ પત્ર જાહેર કર્યો છે. આ પહેલનો મુખ્ય ઉદ્દેશ્ય દેશભરમાં પબ્લિક વાઇ-ફાઇ ઇન્ફ્રાસ્ટ્રક્ચરની વૃદ્ધિને વેગ આપવા અને આ ક્ષેત્રમાં આવતા પડકારોને દૂર કરવાનો છે.
TRAI દ્વારા બહાર પાડવામાં આવેલા આ પત્રમાં અન્ય દેશોની પબ્લિક વાઇ-ફાઇ ઇકોસિસ્ટમ અને ત્યાંની શ્રેષ્ઠ પદ્ધતિઓનો અભ્યાસ કરવામાં આવ્યો છે. ભારતમાં પબ્લિક વાઇ-ફાઇની વર્તમાન સ્થિતિ, તેની સ્થાપનાના વલણો અને ડેટાની માંગની પેટર્નનું પણ મૂલ્યાંકન કરવામાં આવ્યું છે. સંસ્થાએ એવા મુખ્ય મુદ્દાઓની ઓળખ કરી છે જે હાલમાં દેશમાં વાઇ-ફાઇના પ્રસારને અવરોધી રહ્યા છે.
પરામર્શ પત્રમાં ગ્રામીણ વિસ્તારો, શહેરી કેન્દ્રો અને જાહેર સ્થળોએ વાઇ-ફાઇ મોડલ વિકસાવવા માટે કેન્દ્ર અને રાજ્ય સરકારો, સ્થાનિક સંસ્થાઓ, ટેલિકોમ કંપનીઓ (TSPs/ISPs) અને ખાનગી સંસ્થાઓની ભૂમિકા તપાસવામાં આવી છે. આ ઉપરાંત, પબ્લિક વાઇ-ફાઇ ઇકોસિસ્ટમમાં ઓથોરાઇઝેશન, ઓથેન્ટિકેશન, રોમિંગ અને બિલિંગ સિસ્ટમ જેવા તકનીકી મુદ્દાઓ પર પણ ભાર મૂકવામાં આવ્યો છે. ભારતીય સંદર્ભમાં પબ્લિક વાઇ-ફાઇ સેવાઓ લાંબા સમય સુધી ટકી રહે તે માટે યોગ્ય પ્રત્યક્ષ અને પરોક્ષ આવક મોડલ્સનું વિશ્લેષણ પણ આ પત્રમાં સામેલ છે. તેનો હેતુ સેવા પૂરી પાડતી સંસ્થાઓ માટે આર્થિક રીતે સધ્ધર મોડલ તૈયાર કરવાનો છે.
આ પણ વાંચોઃ તીવ્ર ગરમીથી બચવા જ્યોતિરાદિત્ય સિંધિયાએ સૌથી સસ્તો નુસખો બતાવ્યો, જુઓ વીડિયો
