નવી દિલ્હી, 12 સપ્ટેમ્બર 2026: ચેન્નાઈ સુપર કિંગ્સના આગામી મુખ્ય કોચ કોણ હશે? આ પ્રશ્ન હજુ પણ અનુત્તરિત છે. 2009થી 2026 સુધી ટીમની કોચ તરીકે સેવા આપ્યા બાદ, IPL 2026 પછી સ્ટીફન ફ્લેમિંગે CSK સાથેનો સાથ છોડી દીધો હતો. જોકે, આગામી મુખ્ય કોચ તરીકે કોણ જવાબદારી સંભાળશે તે પ્રશ્ન હજુ યથાવત છે. આનો જવાબ ધીમે ધીમે સ્પષ્ટ થઈ રહ્યો છે; ટીમ ઈન્ડિયાના ભૂતપૂર્વ બેટર અને દિલ્હી કેપિટલ્સના કોચ રહી ચૂકેલા હેમંગ બદાનીને સંભવિત ઉમેદવાર તરીકે જોવામાં આવી રહ્યા છે.
‘ઈન્ડિયન એક્સપ્રેસ’ના અહેવાલ મુજબ, એમ.એસ. ધોની ઈચ્છે છે કે ચેન્નાઈના આગામી મુખ્ય કોચ ભારતીય હોય. સીએસકે (CSK)ના સીઈઓ અને મેનેજિંગ ડિરેક્ટર કાશી વિશ્વનાથને જણાવ્યું હતું કે ફ્લેમિંગના ગયા બાદ નવા કોચને શોધવાની જવાબદારી ફ્રેન્ચાઈઝીએ ધોનીને સોંપી છે.
બદાની પાસે કોચિંગનો નોંધપાત્ર અનુભવ છે; તેમણે IPL ઉપરાંત વિદેશી લીગમાં પણ કોચિંગ આપ્યું છે. તેમના માર્ગદર્શન હેઠળની ટીમોએ SA20, ILT20 અને LPLમાં ખિતાબ જીત્યા છે. આ જોતાં, તેઓ ટીમ માટે એક આદર્શ પસંદગી બની શકે છે. જોકે, આ બાબતે ચેન્નાઈ તરફથી અત્યાર સુધી કોઈ સત્તાવાર જાહેરાત કરવામાં આવી નથી.
2024માં દિલ્હીના મુખ્ય કોચ
હેમાંગે 2024માં દિલ્હીના મુખ્ય કોચ તરીકેનો કાર્યભાર સંભાળ્યો અને ૨૦૨૬ સુધી ટીમ સાથે જોડાયેલા રહ્યા. જોકે, તેમના કોચિંગ હેઠળ ટીમ કોઈ પણ ખિતાબ જીતવામાં નિષ્ફળ રહી. IPLમાં તેમનો રેકોર્ડ ઘણો નબળો જણાય છે. ચેન્નાઈ તેના આગામી મુખ્ય કોચ અંગે શું અંતિમ નિર્ણય લે છે તે જોવું રસપ્રદ રહેશે.
ચેન્નાઈએ 2023માં જીત્યું હતું છેલ્લું ટાઇટલ
IPLની સૌથી સફળ ટીમોમાંની એક ગણાતી ચેન્નાઈએ 2023ની ફાઇનલમાં ગુજરાત ટાઇટન્સને હરાવીને તેનું છેલ્લું ટાઇટલ જીત્યું હતું. તે પહેલાં, આ ટીમ 2021માં ચેમ્પિયન બની હતી. ટીમે છેલ્લે ટાઇટલ જીત્યાને હવે ત્રણ વર્ષ વીતી ગયા છે, અને તે જોવું રસપ્રદ રહેશે કે આ ફ્રેન્ચાઇઝી ક્યારે તેની આગામી ટ્રોફી જીતે છે.
વધુ વાંચો: બિહારમાં પૂરનો કહેર: 15 જિલ્લાઓમાં 47 લાખ લોકો પ્રભાવિત
