કુસ્તીબાજ સાક્ષી મલિકે બ્રિજ ભૂષણને નાર્કો ટેસ્ટ કરાવવા અને પોતાને નિર્દોષ સાબિત કરવાનો પડકાર ફેંક્યો
દિલ્હી : રાજધાની દિલ્હીના જંતર-મંતર પર કુસ્તીબાજોનું ધરણા પ્રદર્શન ચાલુ છે.આ દરમિયાન, 2016 રિયો ઓલિમ્પિકમાં બ્રોન્ઝ મેડલ વિજેતા કુસ્તીબાજ સાક્ષી મલિકે રેસલિંગ ફેડરેશન ઓફ ઈન્ડિયા (WFI)ના પ્રમુખ બ્રિજ ભૂષણ શરણ સિંહને પડકાર ફેંક્યો છે. તેણે બ્રિજ ભૂષણને નાર્કો ટેસ્ટ કરાવવા અને પોતાને નિર્દોષ સાબિત કરવાનો પડકાર ફેંક્યો.
સાક્ષીએ જણાવ્યું હતું કે WFIના વડા બ્રિજ ભૂષણને સાત કુસ્તીબાજો દ્વારા તેમના પર લગાવવામાં આવેલા જાતીય સતામણીના આરોપો બાદ જો તેઓ નિર્દોષ હોવાની ખાતરી હોય તો તેમણે જૂઠાણું શોધનાર નાર્કો ટેસ્ટ કરાવવો જોઈએ. વિરોધ કરી રહેલા કુસ્તીબાજોએ એમ પણ કહ્યું કે જો બ્રિજ ભૂષણ હજુ પણ WFI ના કામકાજમાં સામેલ હશે તો તેઓ સ્પર્ધાઓ યોજવાનો વિરોધ કરશે.
સાક્ષી મલિકે પ્રેસ કોન્ફરન્સમાં કહ્યું- હું WFI પ્રમુખને નાર્કો ટેસ્ટ કરાવવાની ચેલેન્જ કરું છું. અમે તપાસ માટે પણ તૈયાર છીએ. સત્ય બહાર આવવા દો કે કોણ દોષિત છે અને કોણ નથી.
તે જ સમયે, 2021 ટોક્યો ઓલિમ્પિકમાં બ્રોન્ઝ મેડલ જીતનાર બજરંગ પુનિયાએ કહ્યું- અમે ઈચ્છીએ છીએ કે તમામ સ્પર્ધાઓ IOAની એડ-હોક પેનલ હેઠળ યોજાય. જો બ્રિજ ભૂષણ તેના કાર્યક્રમોમાં કોઈપણ રીતે સામેલ થશે તો અમે તેનો વિરોધ કરીશું.
બ્રિજ ભૂષણ સામેની તપાસની ધીમી પ્રક્રિયાના વિરોધમાં કુસ્તીબાજોએ ગુરુવારે હાથ પર કાળી પટ્ટી બાંધવાનું પણ નક્કી કર્યું હતું. ધરણા પર બેઠેલા કુસ્તીબાજો એક સગીર સહિત સાત મહિલા કુસ્તીબાજોની જાતીય સતામણી અને ધમકાવવાના આરોપમાં બ્રિજ ભૂષણની ધરપકડની માંગ કરી રહ્યા છે.
દિલ્હી પોલીસે WFI પ્રમુખ વિરુદ્ધ 28 એપ્રિલે બે FIR નોંધી હતી. જો કે હજુ સુધી તપાસ પૂર્ણ થઈ નથી. સુપ્રીમ કોર્ટે પણ આ અંગે દિલ્હી પોલીસને ફટકાર લગાવી હતી.
