જાન્યુઆરીમાં ફરી એકવાર વધી શકે છે ટીવી,ફ્રીઝ અને વોશિંગ મશીનના ભાવ

• ટીવી,ફ્રીઝના ભાવમાં થઇ શકે છે વધારો
• જાન્યુઆરીમાં ફરી વધી શકે છે ભાવ
• કાચા માલની કિંમતમાં સતત વધારો

મુંબઈ:કન્ઝ્યુમર ડ્યુરેબલ ગુડ્સ મેન્યુફેક્ચર્સ એટલે કે રેફ્રિજરેટર, ટીવી, વોશિંગ મશીન વગેરે કંપનીઓએ તેમના ભાવમાં વધારો કર્યો છે. આ વર્ષે કંપનીઓએ ત્રીજી વખત કિંમતોમાં વધારો કર્યો છે.કાચા માલની કિંમતમાં સતત વધારો તેનું મુખ્ય કારણ હોવાનું કહેવાય છે.જાન્યુઆરી 2022માં પણ કંપનીઓ ફરી એકવાર કિંમત વધારવાના મૂડમાં છે.

કન્ઝ્યુમર ઈલેક્ટ્રોનિક્સ એન્ડ એપ્લાયન્સીસ મેન્યુફેક્ચરર્સ એસોસિએશનના પ્રમુખ એરિક બ્રેગેન્ઝાના જણાવ્યા અનુસાર, કંપનીઓએ 2021માં કિંમતોમાં 12 થી 13 ટકાનો વધારો કર્યો છે, જ્યારે આ સમયગાળા દરમિયાન તેમની કિંમતોમાં 20 ટકાનો વધારો થયો છે. તેથી, તેમની પાસે હજુ પણ કિંમતમાં 6 થી 8 ટકાનો વધારો કરવાની શક્યતા છે.

ગોદરેજ એપ્લાયન્સીસે ડિસેમ્બરમાં કિંમતમાં 3 થી 4 ટકાનો વધારો કર્યો છે અને જાન્યુઆરી 2022માં પણ આ જ ભાવવધારો કરવાનો નિર્ણય લીધો છે. કન્ઝ્યુમર ડ્યુરેબલ્સ કંપનીઓ તહેવારોની સિઝનના અંતની રાહ જોઈ રહી હતી જેથી તેઓ ભાવમાં વધારો કરે, કારણ કે તેઓ તહેવાર અને નબળી માંગ વચ્ચે ભાવ વધારવા માંગતા ન હતા. તેથી, કંપનીઓએ ડિસેમ્બરમાં અને પછી જાન્યુઆરીમાં રેફ્રિજરેટર, વોશિંગ મશીન અને એર કંડિશનર જેવી શ્રેણીઓમાં કિંમતો વધારવાનો નિર્ણય કર્યો છે.

કંપનીઓ શા માટે આટલી વાર કિંમતમાં વધારો કરી રહી છે. તાંબુ, સ્ટીલ અને એલ્યુમિનિયમ જેવી મોટી ધાતુઓની સાથે સાથે ક્રૂડ ઓઈલના ભાવ પણ સતત વધી રહ્યા છે.

2021ની શરૂઆતથી નવેમ્બરની વચ્ચે આ તમામ કોમોડિટીના ભાવમાં 25 થી 140 ટકાનો વધારો થયો છે. આવી સ્થિતિમાં કંપનીઓનો ઉત્પાદન ખર્ચ ઘણો વધી ગયો છે, જેનો બોજ તેઓ હવે ગ્રાહકોના ખિસ્સા પર નાખી રહી છે.