નવી દિલ્હીઃ પાકિસ્તાને ઈરાન સાથે બિલિયન ડોલરની ગેસ પાઈપલાઈન ડીલને અસ્થાયી રૂપે અટકાવી દીધી છે. એક રિપોર્ટ્સમાં દાવો કરવામાં આવ્યો છે કે પાકિસ્તાને અમેરિકાના દબાણને કારણે આ નિર્ણય લીધો છે. ઈરાન સાથેના ગેસ પાઈપલાઈન પ્રોજેક્ટમાંથી પાકિસ્તાનને સસ્તો ગેસ મળવાનો હતો, પરંતુ ઈરાનના પરમાણુ કાર્યક્રમ પર અમેરિકી પ્રતિબંધોને કારણે પાકિસ્તાને હાલમાં આ પ્રોજેક્ટમાંથી પીછેહઠ કરી છે.
પાકિસ્તાન આ દિવસોમાં ગંભીર આર્થિક સંકટનો સામનો કરી રહ્યું છે. આવી સ્થિતિમાં પાકિસ્તાન સરકાર ત્રણ અબજ ડોલરની લોન માટે ઇન્ટરનેશનલ મોનેટરી ફંડ (IMF) સાથે વાતચીત કરી રહી છે. એવું માનવામાં આવે છે કે, IMF સાથેના સોદામાં કોઈ સમસ્યા ન હોવી જોઈએ, તેથી પાકિસ્તાને ઈરાન ગેસ પાઈપલાઈન પ્રોજેક્ટમાંથી બહાર નીકળી લીધું છે. પહેલા ભારત પણ આ ગેસ પાઈપલાઈન પ્રોજેક્ટમાં સામેલ હતું પરંતુ બાદમાં ભારત આ ડીલમાંથી બહાર આવ્યું હતું.
પાકિસ્તાની મીડિયાએ અહેવાલ આપ્યો છે કે, ઇસ્લામાબાદે ‘બાહ્ય દબાણ‘ના કારણે ઇરાન ગેસ પાઇપલાઇન પ્રોજેક્ટ પર રોક લગાવી દીધી છે. જ્યાં સુધી ઈરાનને અમેરિકી પ્રતિબંધોમાંથી રાહત નહીં મળે અથવા અમેરિકા સ્પષ્ટપણે પાકિસ્તાનને મંજૂરી ન આપે ત્યાં સુધી પાકિસ્તાન આ પ્રોજેક્ટને આગળ વધારી શકશે નહીં. પાકિસ્તાન ઉર્જા સંકટનો સામનો કરી રહ્યું છે, આવી સ્થિતિમાં ઈરાન-પાકિસ્તાન ગેસ પાઈપલાઈનનું કામ અટકાવવું તેના માટે મોટો ફટકો છે.
પાકિસ્તાનના પેટ્રોલિયમ રાજ્ય મંત્રી મુસાદિક મલિકે પાકિસ્તાનની નેશનલ એસેમ્બલીમાં એક લેખિત જવાબમાં ઈરાન સાથેની ગેસ પાઈપલાઈન સમજૂતીમાંથી બહાર નીકળવાની માહિતી આપી હતી. તેમણે કહ્યું કે ઈરાન પરના આંતરરાષ્ટ્રીય પ્રતિબંધોને કારણે આ સોદો અટકાવી દેવામાં આવ્યો હતો. તેમણે કહ્યું કે આ પ્રોજેક્ટ પૂરો કરવાની સમય મર્યાદા નક્કી નથી.
