ઇન્સ્ટાગ્રામ પર પણ પીએમ મોદીનો દબદબો: 10 કરોડ ફોલોઅર્સનો આંકડો પાર કરનાર દુનિયાના પ્રથમ નેતા બન્યા
નવી દિલ્હી, 26 ફેબ્રુઆરી 2026: વડાપ્રધાન નરેન્દ્ર મોદીએ સોશિયલ મીડિયા પ્લેટફોર્મ ઇન્સ્ટાગ્રામ પર 100 મિલિયન (10 કરોડ) ફોલોઅર્સનો મોટો આંકડો પાર કરી લીધો છે. આ સાથે જ તેઓ આ લોકપ્રિય સોશિયલ મીડિયા પ્લેટફોર્મ પર આ ઐતિહાસિક મુકામ હાંસલ કરનાર દુનિયાના પ્રથમ અને એકમાત્ર નેતા બની ગયા છે. વર્ષ 2014માં ઇન્સ્ટાગ્રામ સાથે જોડાયા બાદ, છેલ્લા એક દાયકામાં પીએમ મોદીએ પોતાના એકાઉન્ટને વૈશ્વિક નેતાઓમાં સૌથી વધુ એક્ટિવ અને સૌથી વધુ ફોલો કરવામાં આવતા ડિજિટલ પ્લેટફોર્મમાંનું એક બનાવ્યું છે.
પ્લેટફોર્મ પર તેમની લોકપ્રિયતા અને હાજરી સતત વધી રહી છે, જે દેશ અને દુનિયાના લોકો સાથે જોડાવાની તેમની મજબૂત રણનીતિ દર્શાવે છે. હાલમાં વિશ્વના ટોચના નેતાઓમાં પીએમ મોદીના ઇન્સ્ટાગ્રામ પર સૌથી વધુ ફોલોઅર્સ છે. ખાસ વાત એ છે કે, અમેરિકાના રાષ્ટ્રપતિ ડોનાલ્ડ ટ્રમ્પ કરતા તેમના ફોલોઅર્સની સંખ્યા બમણી કરતા પણ વધુ છે. એટલું જ નહીં, દુનિયાના અન્ય પાંચ મોટા નેતાઓના કુલ ફોલોઅર્સની સંખ્યા ભેગી કરવામાં આવે તો પણ તે વડાપ્રધાન મોદીના એકલાના ફોલોઅર્સ કરતા ઓછી થાય છે.
અમેરિકાના રાષ્ટ્રપતિ ડોનાલ્ડ ટ્રમ્પના 43.2 મિલિયન, ઈન્ડોનેશિયાના પ્રબોવો સુબિયાંતોના 15 મિલિયન, બ્રાઝિલના લુલા દા સિલ્વાના 14.4 મિલિયન, તુર્કીના રેસેપ તૈયપ એર્દોગનના 11.6 મિલિયન અને આર્જેન્ટિનાના જેવિયર માઈલીના 6.4 મિલિયન ફોલોઅર્સ છે. અન્ય સોશિયલ મીડિયા પ્લેટફોર્મ એક્સ પર પીએમ મોદીના 106.2 મિલિયન અને ફેસબુક પર 54 મિલિયન ફોલોઅર્સ છે. આ આંકડા તેમની વૈશ્વિક પહોંચ અને લોકો સાથેના મજબૂત કનેક્શનને સાબિત કરે છે.
ભારતીય રાજકારણીઓની વાત કરીએ તો, પીએમ મોદી અન્ય નેતાઓ કરતા ઘણા આગળ છે. ઇન્સ્ટાગ્રામ પર ઉત્તર પ્રદેશના મુખ્યમંત્રી યોગી આદિત્યનાથ લગભગ 16.1 મિલિયન ફોલોઅર્સ સાથે બીજા નંબરે છે, જ્યારે લોકસભામાં વિપક્ષના નેતા રાહુલ ગાંધીના ફોલોઅર્સની સંખ્યા અંદાજે 12.6 મિલિયન છે.
ડિસેમ્બર 2025 સુધીના આંકડા મુજબ, વડાપ્રધાન મોદીએ દુનિયાના અલગ-અલગ નેતાઓમાં સૌથી વધુ અપ્રૂવલ રેટિંગ મેળવ્યું છે. ‘સ્ટેટિસ્ટા’ના અહેવાલ અનુસાર, પીએમ મોદીનું અપ્રૂવલ રેટિંગ 70 ટકા છે, જેના કારણે તેઓ વૈશ્વિક નેતાઓની યાદીમાં ટોચ પર રહ્યા છે. જાપાનના વડાપ્રધાન સાને તાકાઇચી 63 ટકા રેટિંગ સાથે બીજા, આર્જેન્ટિનાના જેવિયર માઇલી 60 ટકા સાથે ત્રીજા અને અમેરિકન રાષ્ટ્રપતિ ડોનાલ્ડ ટ્રમ્પ 43 ટકા રેટિંગ સાથે 11મા ક્રમે છે.
અમેરિકન બિઝનેસ ઇન્ટેલિજન્સ ફર્મ ‘મોર્નિંગ કન્સલ્ટ દ્વારા 2 ફેબ્રુઆરીથી 8 ફેબ્રુઆરી વચ્ચે એકત્રિત કરવામાં આવેલા લેટેસ્ટ ડેટા અનુસાર પણ પીએમ મોદી 67 ટકા અપ્રૂવલ રેટિંગ સાથે પ્રથમ ક્રમે અકબંધ છે. જ્યારે, ડોનાલ્ડ ટ્રમ્પ 40 ટકા રેટિંગ સાથે 11મા સ્થાને છે.
આ પણ વાંચોઃ આધાર કાર્ડની પેરડી કરતો સોનુ નિગમનો વીડિયો વાયરયલ, જુઓ અહીં
