આ 6 સ્માર્ટ ફેશન ટ્રિક્સથી સામાન્ય આઉટફિટમાં પણ મેળવો ક્લાસી લુક
આજના સમયમાં સોશિયલ મીડિયાના પ્રભાવ હેઠળ ફેશન ટ્રેન્ડ્સ ઝડપથી બદલાઈ રહ્યા છે. દરેક યુવતી અને મહિલાની ઈચ્છા હોય છે કે તે બોલિવૂડ સેલિબ્રિટીઝની જેમ જ સ્ટાઇલિશ, ક્લાસી અને લક્ઝુરિયસ દેખાય. પરંતુ, મોટાભાગના લોકો એવું માને છે કે ‘રિચ લુક’ મેળવવા માટે મોંઘા બ્રાન્ડેડ કપડાં ખરીદવા જ અનિવાર્ય છે. ફેશન એક્સપર્ટ્સ આ માન્યતાને તદ્દન ખોટી ગણાવે છે. વાસ્તવમાં, મોંઘા કપડાં ખરીદવા કરતાં કપડાંને યોગ્ય રીતે સ્ટાઇલ કરવાનું સાચું સેન્સ હોવું વધુ જરૂરી છે. ઘણીવાર હજારો રૂપિયાના આઉટફિટ પહેરવા છતાં વ્યક્તિ આકર્ષક નથી લાગતી, જ્યારે સામાન્ય કપડાંમાં પણ કેટલાક લોકો મહેફિલ લૂંટી લે છે. જો તમે પણ તમારા દરેક આઉટફિટને મોંઘો અને એલિગન્ટ લુક આપવા માંગો છો, તો દર વખતે નવો ડ્રેસ ખરીદવાને બદલે માત્ર આ 6 સ્માર્ટ સ્ટાઇલિંગ ટિપ્સ ફોલો કરો:
કપડાંનું પરફેક્ટ ફિટિંગ છે સૌથી પહેલી શરત
કોઈપણ કપડાં ભલે ગમે તેટલા મોંઘા હોય, પરંતુ જો તેની ફિટિંગ બરાબર ન હોય તો તે તમારો આખો લુક બગાડી શકે છે. અતિશય ઢીલા કે બહુ વધારે ટાઈટ કપડાં પહેરવાને બદલે હંમેશા તમારી બોડી ટાઈપ મુજબના પરફેક્ટ ફિટિંગ વાળા કપડાં પસંદ કરો. જો રેડીમેડ કપડાંમાં ફિટિંગ બરાબર ન હોય, તો તેને ટેલર પાસે અલ્ટર કરાવીને જ પહેરો. પ્રોપર ફિટિંગ આઉટફિટને તરત જ પ્રીમિયમ લુક આપે છે.
ન્યૂટ્રલ અને સોલિડ કલર્સને આપો પ્રાધાન્ય
સ્ટાઇલિંગમાં રંગોની પસંદગી ખૂબ મહત્વનો ભાગ ભજવે છે. જો તમે ક્લાસી અને હાઈ-ક્લાસ લુક ઈચ્છો છો, તો બજારમાં મળતા બહુ ચળકતા અથવા મોટા પ્રિન્ટવાળા કપડાં ટાળો. તેના બદલે સોલિડ (પ્લેન) અને ન્યૂટ્રલ કલર્સ જેવા કે બ્લેક, વ્હાઇટ, બેજ (ક્રીમ), બ્રાઉન, નેવી બ્લુ અને પેસ્ટલ શેડ્સ પસંદ કરો. આ સિવાય તમે આજકાલ ટ્રેન્ડમાં ચાલી રહેલો ‘મોનોક્રોમ લુક’ (ટોપ અને બોટમ બંને એક જ કલરના હોય) પણ ટ્રાય કરી શકો છો, જે ખૂબ જ રોયલ લાગે છે.
‘મિનિમલ જ્વેલરી’થી મેળવો રોયલ ટચ
એક્સપર્ટ્સનું માનવું છે કે ફેશનની દુનિયામાં હંમેશા “Less is More” (જેટલું ઓછું એટલું સારું) નો નિયમ કામ કરે છે. ખૂબ જ ભારે અને ચમકતી જ્વેલરી પહેરવાને બદલે ગળામાં એક સિમ્પલ ચેઈન, નાના ગોલ્ડ કે સિલ્વરના ઈયરીંગ્સ (બુટ્ટી), એક ક્લાસી ઘડિયાળ કે નાજુક બ્રેસલેટ કેરી કરો. મિનિમલ જ્વેલરી લુકને સોફિસ્ટિકેટેડ અને મોંઘો બનાવે છે.
ફૂટવેર અને હેન્ડબેગ પર ખાસ ધ્યાન આપો
મોટાભાગના લોકો માત્ર કપડાં પાછળ જ ધ્યાન આપે છે અને ચંપલ કે બેગને નજરઅંદાજ કરે છે. યાદ રાખો કે જો તમારા ફૂટવેર અને હેન્ડબેગ ક્લાસી હશે, તો તમારા સાદા કપડાં પણ મોંઘા લાગશે. હંમેશા સાફ-સુથરા અને સારી ક્વોલિટીના શૂઝ અથવા હીલ્સ પહેરો. આ સાથે જ સોફ્ટ બેગના બદલે એક સરસ સ્ટ્રક્ચર્ડ હેન્ડબેગ કલેક્શનમાં સામેલ કરો.
‘લેયરિંગ’થી આઉટફિટને બનાવો આકર્ષક
તમારા સાદા ટી-શર્ટ કે કુર્તીને પણ ફેશનેબલ બનાવવા માટે લેયરિંગ બેસ્ટ ઓપ્શન છે. આઉટફિટ પર મેચિંગ બ્લેઝર, શ્રગ, કીમોનો, જેકેટ અથવા સ્ટાઈલિશ સ્ટોલ એડ કરવાથી લુકમાં એક અલગ જ ડેપ્થ અને એલિગન્સ ઉમેરાય છે. ખાસ કરીને ફોર્મલ કે સેમી-ફોર્મલ લુક માટે બ્લેઝર સાદા આઉટફિટને પણ ત્વરિત હાઈ-એન્ડ ફીલ આપે છે.
પર્સનલ ગ્રૂમિંગ અને આત્મવિશ્વાસ
ગમે તેટલા સારા કપડાં પહેર્યા હોય પરંતુ જો તમારા વાળ વિખરાયેલા હોય કે નખ સાફ ન હોય તો લુક ખરાબ લાગે છે. આથી નિયમિત સ્કીન કેર, નેચરલ કે હળવો મેકઅપ અને વ્યવસ્થિત હેરસ્ટાઈલ જેવી પર્સનલ ગ્રૂમિંગની બાબતો પર ધ્યાન આપો. સૌથી મહત્વની વાત, તમે ગમે તે આઉટફિટ પહેરો, તેને પૂરા આત્મવિશ્વાસ સાથે કેરી કરો. એક મજબૂત બોડી લેંગ્વેજ સામાન્ય કપડાંને પણ અદભુત બનાવી શકે છે.
