નવી દિલ્હી, 12 સપ્ટેમ્બર 2026: પાકિસ્તાનના પૂર્વ ફાસ્ટ બોલર વસીમ અક્રમે પાકિસ્તાન સુપર લીગ (PSL) અને દેશના સ્થાનિક ક્રિકેટ માળખા સામે ગંભીર સવાલો ઉઠાવ્યા છે. ભારતના યુવા બેટ્સમેન વૈભવ સૂર્યવંશીનું ઉદાહરણ આપતાં અક્રમે સ્વીકાર્યું હતું કે, PSLને શરૂ થયાને 10 વર્ષ વીતી ગયા હોવા છતાં લીગ વૈશ્વિક સ્તરે ભારતની IPLની સરખામણીએ ખાસ બેટિંગ ટેલેન્ટ શોધવામાં નિષ્ફળ રહી છે.
એક ઇન્ટરવ્યુ દરમિયાન અક્રમે જણાવ્યું હતું કે, માત્ર 15 વર્ષની ઉંમરે વૈભવ સૂર્યવંશીએ IPLમાં શાનદાર પ્રદર્શન કરીને પોતાની ઓળખ બનાવી અને ત્યારબાદ ઇંગ્લેન્ડ સામે ભારતીય ટીમ તરફથી આંતરરાષ્ટ્રીય ક્રિકેટમાં ડેબ્યૂ પણ કર્યું. અક્રમના મતે, ભારત જે રીતે નાની વયના બેટિંગ ટેલેન્ટને પ્રોત્સાહન આપે છે તેવી સિસ્ટમ પાકિસ્તાનમાં જોવા મળતી નથી. PSLમાંથી સારા બોલરો ચોક્કસ મળ્યા છે, પરંતુ 10 વર્ષમાં એકપણ એવો વિસ્ફોટક બેટ્સમેન મળ્યો નથી જેણે આંતરરાષ્ટ્રીય સ્તરે નામ કમાવ્યું હોય.
-
ક્લબ ક્રિકેટને ફરી મજબૂત કરવાની સલાહ
પાકિસ્તાન ક્રિકેટ બોર્ડને સલાહ આપતાં વસીમ અક્રમે જણાવ્યું હતું કે, જો પાકિસ્તાને રેડ બોલ (ટેસ્ટ) ક્રિકેટ અને પોતાની ટેલેન્ટ પાઇપલાઇન સુધારવી હોય તો કરાચી અને લાહોર જેવા શહેરોમાં ક્લબ ક્રિકેટને ફરીથી ધમધમતું કરવું પડશે. યુવા ખેલાડીઓનો પાયો ક્લબ ક્રિકેટથી જ મજબૂત થાય છે.
અત્રે ઉલ્લેખનીય છે કે, વસીમ અક્રમ IPLમાં કોલકાતા નાઇટ રાઇડર્સના બોલિંગ કોચ અને મેન્ટર રહી ચૂક્યા છે, જ્યારે PSLમાં પણ વિવિધ ફ્રેન્ચાઇઝી સાથે જોડાયેલા રહ્યા છે. તેથી બંને લીગના માળખા વિશે તેઓ ઊંડો અનુભવ ધરાવે છે.
