કિવ, 29 ઓક્ટોબર 2026: યુક્રેનના નિપ્રો રેલવે સ્ટેશન પર રશિયા દ્વારા કરવામાં આવેલા ઘાતક ડ્રોન હુમલામાં 13 લોકોનાં મોત થયાં અને 10 લોકો ઘાયલ થયા. આ હુમલો સ્ટેશનના એ પ્લેટફોર્મ પર થયો હતો જ્યાં એક ટ્રેન ઊભી હતી.
પ્લેટફોર્મ પર ઊભેલી ટ્રેન પર હુમલો
ટેલિગ્રામ પરની એક પોસ્ટમાં, યુક્રેનિયન રેલવેએ જણાવ્યું હતું કે આ હુમલો અત્યાધુનિક જેટ-સંચાલિત ડ્રોનનો ઉપયોગ કરીને કરવામાં આવ્યો હતો. આ જેટ ડ્રોને સ્ટેશનના તે પ્લેટફોર્મને નિશાન બનાવ્યું હતું જ્યાં ટ્રેન નંબર 866 (ડિનિપ્રો–ઝાપોરિઝિયા) ઊભી હતી.
અધિકારીઓના જણાવ્યા અનુસાર, આ વિસ્તાર માટે હાઈ એલર્ટ જાહેર કરવામાં આવ્યું હોવા છતાં પ્લેટફોર્મ પર મોટી સંખ્યામાં મુસાફરો હાજર હતા, જેના કારણે જાનહાનિ અને મૃત્યુઆંકમાં વધારો થયો.
ડિનિપ્રોના મેયર બોરિસ ફિલાટોવે આ ઘટનાને શહેર માટે એક મોટી દુર્ઘટના ગણાવી હતી. તેમણે જણાવ્યું કે, રશિયન ડ્રોને નાગરિકોને લઈ જતી એક પેસેન્જર ઇલેક્ટ્રિક ટ્રેનને જાણીજોઈને નિશાન બનાવી હતી.
ઝેલેન્સ્કીએ આંતરરાષ્ટ્રીય પગલાં લેવા આહ્વાન કર્યું
આ હુમલા બાદ, યુક્રેનના રાષ્ટ્રપતિ વોલોડીમિર ઝેલેન્સ્કીએ આંતરરાષ્ટ્રીય સમુદાયને રશિયા વિરુદ્ધ મક્કમ પગલાં લેવા અપીલ કરી.
સોશિયલ મીડિયા પ્લેટફોર્મ ‘X’ પર ઝેલેન્સ્કીએ લખ્યું, “તણાવ ઘટાડવાને બદલે, રશિયાના અમુક ઉદ્યોગપતિઓ અને ઊર્જા ક્ષેત્ર પરથી પ્રતિબંધો હટાવ્યા ત્યારથી રશિયાએ આપણા લોકો વિરુદ્ધ કેટલા આતંકવાદી હુમલા કર્યા છે?”
પરિવહન નેટવર્ક્સ પર રશિયાના તીવ્ર બનતા હુમલા
યુક્રેનના સરકારી રેલવે સંચાલકના જણાવ્યા અનુસાર, ગયા મહિને એક રવિવારે યુક્રેન-પોલેન્ડ સરહદ નજીક એક ટ્રેન પર રશિયન ડ્રોન દ્વારા હુમલો કરવામાં આવ્યો હતો. આ ઘટના ત્યારે બની જ્યારે યુકે અને સ્વીડનના ભૂતપૂર્વ વડા પ્રધાનો સહિતના અનેક ઉચ્ચ અધિકારીઓ તે વિસ્તારમાંથી મુસાફરી કરી રહ્યા હતા.
વધુ વાંચો: શિવપુરીમાં કરુણ ઘટના! બહેનના મોતના આઘાતમાં બીજી બહેને ત્રણ બાળકો સાથે કૂવામાં ઝંપલાવ્યું, 6નાં મોત
