જયપુર, 13 સપ્ટેમ્બર 2026: રાજસ્થાનના ચુરુ જિલ્લામાંથી એક હૃદયદ્રાવક ઘટના સામે આવી છે. સાલાસર બાલાજી મંદિરના દર્શને પગપાળા જઈ રહેલા ત્રણ યુવકોના માર્ગ અકસ્માતમાં મોત થયા છે. આ અકસ્માત શુક્રવારે મોડી રાત્રે સાલાસર મંદિરથી લગભગ એક કિલોમીટર પહેલાં થયો હતો.
સાલાસર પોલીસ સ્ટેશનના એસએચઓ (SHO) શંખલ લાલ ભારીએ જણાવ્યું હતું કે મૃત્યુ પામેલા ત્રણેય યુવકો પગપાળા યાત્રા કરી રહ્યા હતા. આ ત્રણેય જણા લગભગ 80 લોકોના જૂથ સાથે 10 સપ્ટેમ્બરે જાયલથી સાલાસર બાલાજી જવા માટે પગપાળા નીકળ્યા હતા.
શુક્રવારની રાત્રે, આખું જૂથ સાલાસરથી લગભગ 11 કિલોમીટર દૂર આવેલા ગનેરી ખાતે આરામ કરવા માટે રોકાયું હતું. જોકે, આ ત્રણ યુવાનોએ તે જ રાત્રે સાલાસર પહોંચવાનો નિર્ણય કર્યો અને આગળ વધ્યા.
જ્યારે તેઓ સાલાસર નજીક પહોંચ્યા, ત્યારે એક અજાણ્યા વાહને તેમને જોરદાર ટક્કર મારી, જેના પરિણામે ત્રણેયનાં ઘટનાસ્થળે જ મોત નીપજ્યાં. અકસ્માતમાં જીવ ગુમાવનારા ત્રણેય યુવકોની ઓળખ રાજેશ ભાર્ગવ (27), નટવર ભાર્ગવ (29) અને વિક્રમ ભાર્ગવ (24) તરીકે કરવામાં આવી છે.
પોલીસ તપાસમાં જોડાઈ
ઘટનાની જાણ થતાં જ પોલીસ તાત્કાલિક ઘટનાસ્થળે પહોંચી હતી. આ અંગે કેસ નોંધવામાં આવ્યો છે અને ટક્કર બાદ નાસી ગયેલા અજાણ્યા વાહનની શોધખોળ ચાલી રહી છે. વાહન અને તેના ચાલકને શોધી કાઢવા માટે આસપાસના વિસ્તારના સીસીટીવી ફૂટેજની પણ તપાસ કરવામાં આવી રહી છે. આ દુઃખદ અકસ્માતને કારણે મૃતકોના પરિવારો અને યાત્રાળુઓનું જૂથ ભારે શોકની લાગણી અનુભવી રહ્યા છે.
વધુ વાંચો: કર્ણાટકની સરકારી શાળાઓમાં બાળકોના જૂતાં મામલે ‘કૌભાંડ’ના આક્ષેપો, 15 જિલ્લાઓમાં તપાસના આદેશ
