નવી દિલ્હી, 21 નવેમ્બર 2026: નવી દિલ્હીમાં આયોજિત પ્રથમ ‘એસઈઓ સિવિલાઇઝેશનલ ડાયલોગ ફોરમ’માં પાકિસ્તાનના મંત્રી મુસાદિક મસૂદ મલિકની હાજરીને લઈને દેશના રાજકારણમાં ગરમાવો આવી ગયો છે. કોંગ્રેસ સહિતના વિપક્ષી દળો પાકિસ્તાની મંત્રીની ભારત મુલાકાત સામે સવાલો ઉઠાવી રહ્યા છે. આ દરમિયાન, સરહદ પારના આતંકવાદ અંગે પૂછાયેલા સીધા સવાલો પર પાકિસ્તાની મંત્રીએ સ્પષ્ટ જવાબ આપવાનું ટાળ્યું હતું, પરંતુ બંને દેશો વચ્ચેના સંબંધો સુધારવા માટે શાયરાના અંદાજમાં વકાલત કરી હતી.
પત્રકારો દ્વારા જ્યારે પૂછવામાં આવ્યું કે લાંબા સમય બાદ પાકિસ્તાનના કોઈ મંત્રી ભારત આવ્યા છે, ત્યારે ફોરમમાં ભાગ લીધા બાદ મુસાદિક મસૂદ મલિકે શાયરાના અંદાજમાં જવાબ આપતા કહ્યું હતું કે, “મને આશા છે કે ફરીથી તમે ફરિયાદ નહીં કરો અને અમારી અવરજવર ચાલુ રહેશે…” જોકે, પાકિસ્તાનમાં આતંકવાદ વિરુદ્ધ કોઈ નક્કર કાર્યવાહી ન થવા અંગે પૂછાયેલા પ્રશ્ન પર મલિકે મુદ્દાને દ્વિપક્ષીય સ્તરથી હટાવીને પ્રાદેશિક સ્તર પર લઈ જવાનો પ્રયાસ કર્યો હતો. તેમણે જણાવ્યું હતું કે, “હું અહીં એક મલ્ટિલેટરલ ફોરમમાં આવ્યો છું અને ઇચ્છું છું કે અહીં યોગ્ય દિશામાં વાતચીત થાય. આપણે જે સમસ્યાઓનો સામનો કરી રહ્યા છીએ તે માત્ર આપણા બે દેશો પૂરતી મર્યાદિત નથી, પરંતુ તે ઘણી મોટી અને વ્યાપક બની ગઈ છે.”
પાકિસ્તાની મંત્રીએ વધુમાં જણાવ્યું હતું કે, “આપણા પડોશમાં એટલે કે ઈરાન, મધ્ય એશિયા અને અફઘાનિસ્તાનમાં મોટા પડકારો ઊભા થયા છે. હું આટલી મહત્વપૂર્ણ વાતચીતને માત્ર દ્વિપક્ષીય સંદર્ભ પૂરતી મર્યાદિત રાખવા માંગતો નથી. જ્યારે આતંકવાદ પર વાત કરવાનો સમય આવશે, ત્યારે તમે જાણો જ છો કે અમારા હજારો લોકો શહીદ થયા છે. આ મામલે પારદર્શિતા સુનિશ્ચિત કરવી પડશે અને બંને પક્ષોએ પુરાવા રજૂ કરવા પડશે.” તેમણે દાવો કર્યો હતો કે પાકિસ્તાનનો ઉદ્દેશ્ય એક પારદર્શક સિસ્ટમ ઊભી કરવાનો છે, જેનાથી પરસ્પર વિશ્વાસ પાછો લાવી શકાય અને સમસ્યાઓનો યોગ્ય ઉકેલ નીકળી શકે.
-
એકબીજા પર આંગળી ચીંધવાને બદલે ઉકેલ શોધીએઃ પાકિસ્તાન
ભારત મુલાકાત દરમિયાન પોતાનો પક્ષ રાખતા મલિકે કહ્યું કે, “ઘણીવાર જરૂરી પુરાવા રજૂ કરવામાં આવતા નથી. અમે આતંકવાદના મામલે ઘણું સહન કર્યું છે અને તમે પણ આવી ઘણી ઘટનાઓનો અનુભવ કર્યો છે. અમે પણ આ તમામ મુદ્દાઓનો કાયમી ઉકેલ ઇચ્છીએ છીએ. આપણો પડોશી વિસ્તાર જટિલ પરિસ્થિતિમાંથી પસાર થઈ રહ્યો છે અને સમગ્ર ક્ષેત્રના પડકારોને ઉકેલવાની જરૂર છે.” અંતમાં તેમણે જણાવ્યું હતું કે, “અમારી દિલથી ઈચ્છા છે કે આપણી પાસે જે ફોરમ ઉપલબ્ધ છે તેનો સારો ઉપયોગ થાય. કોઈ એક ઘટના કે દ્વિપક્ષીય વાતચીત પર ધ્યાન કેન્દ્રિત કરવાને બદલે—જ્યાં અવારનવાર એકબીજા પર આંગળી ચીંધવાની આદત જોવા મળે છે—સમગ્ર વિસ્તારની સમસ્યાઓને એક વ્યવસ્થિત સિસ્ટમ અને નક્કર પુરાવાઓના આધારે ઉકેલવી વધુ બહેતર રહેશે. હું અહીં માત્ર પીડિત હોવાની કહાની સંભળાવવા નથી આવ્યો, પરંતુ અમે પરિસ્થિતિને સુધારવાનો પૂરો પ્રયાસ કરી રહ્યા છીએ.”








