અમદાવાદઃ શહેરના સરદાર વલ્લભભાઈ પટેલ ઇન્ટરનેશનલ એરપોર્ટના કાર્ગોમાંથી સાત કિલોગ્રામ જેટલા સોનાની કથિત ચોરીનો બનાવ પ્રકાશમાં આવતા કસ્ટમ અધિકારીઓમાં દોડધામ મચી ગઈ હતી. ચોરી થયેલા સોનાની માર્કેટ કિંમત સાડા ત્રણ કરોડ રુપિયા જેટલી આંકવામાં આવી છે. કહેવાય છે કે ચોરી કરવામાં આવેલું સોનું 32 કિલોગ્રામના એ કન્સાઇન્મેન્ટનો ભાગ હતો જેને ઓટો મોબાઈલ પાર્ટ્સ તરીકે ગણાવીને દેશમાં લઈ આવવામાં આવ્યું હતું.
સુત્રોના જણાવ્યા મુજબ અમદાવાદ એર કાર્ગો કોમ્પ્લેક્સમાં થયેલી આ ચોરી પાછળ કોઈ કસ્ટમ અધિકારીની ભાગીદારી હોવાનું પણ માનવામાં આવે છે. પોલીસ અને કસ્ટમ વિભાગનું આ પ્રકારને માનવું છે. આ ચોરી બે મહિના પહેલા મે મહિનામાં થઈ હોવાનું માનવામાં આવે છે. ત્યારબાદ AACC દ્વારા તપાસ માટે સિટી ક્રાઈમ બ્રાન્ચને અરજી કરવામાં આવી છે.
પ્રાપ્ત જાણકારી અનુસાર દુબઈથી આવેલા કાર્ગો કન્સાઇન્મેન્ટમાં 32 કિલોગ્રામ ઓટો મોબાઈલ પાર્ટ્સ હોવાનું દર્શાવવામાં આવ્યું હતું. તેને કસ્ટમ ક્લિયરન્સ માટે વેરહાઉસમાં રાખવામાં આવ્યું હતું. જોકે અમદાવાદ કસ્ટમ અધિકારીઓને ઇન્ટેલિજન્સ ઇનપુટ મળ્યા હતા કે, આ કાર્ગો સંબંધમાં ખોટી જાણકારી આપવામાં આવી છે. આ કાર્ગોમાં ખોટી રીતે સોનું છુપાવીને રાખવામાં આવ્યું છે.
સૂત્રોના કહેવા મુજબ કન્સાઇમેન્ટનું નિરીક્ષણ કરતાં તેમાં સાત કિલોગ્રામ જેટલું ઓછું વજન જોવા મળ્યું હતું. ત્યાર બાદ કસ્ટમ વિભાગના અધિકારીઓએ તપાસ શરૂ કરી અને સીસીટીવી ફુટેજ સાથે સાક્ષીઓના નિવેદન પણ લેવામાં આવ્યા હતા. તપાસમાં સામે આવ્યું હતું કે કાર્ગોના કન્સાઇન્મેન્ટ સાથે છેડછાડ કરવામાં આવી છે. તેમજ તેની પાછળ કસ્ટમ વિભાગના જ કોઈ અધિકારીની સંડોવણી હોવાનું સામે આવ્યું છે.
ફુટેજના એક સંદિગ્ધને કારમાં કોઈ સામાન રાખીને બહાર નીકળતો જોવામાં આવી રહ્યો છે. કોરોના પ્રતિબંધોના કારણે 23 એપ્રિલના રોજ માર્કેટ બંધ કરવામાં આવ્યા ત્યારે અમદાવાદમાં સોની બજારમાં 10 ગ્રામ સોનાની કિંમત 49 હજાર 500 રુપિયા જેટલી હતી. આ હિસાબે ચોરી કરવામાં આવેલા સોનાની કિંમત લગભગ સાડા ત્રણ કરોડ જેટલી થાય છે. આ અંગે કસ્ટમ વિભાગના અધિકારી વિરુદ્ધ ફરિયાદ દાખલ કરવામાં આવી શકે છે.
