કાંકેરઃ છત્તીસગઢના કાંકેર જિલ્લામાં ભારતીય જનતા પાર્ટીના સાંસદના કાફલામાં એક વાહન સાથે બાઇક અથડાતાં બાઇક પર મુસાફરી કરી રહેલા ત્રણ લોકોના મોત થયા હતા. પોલીસ અધિકારીઓએ જણાવ્યું હતું કે જિલ્લાના અંતાગઢ પોલીસ સ્ટેશન વિસ્તાર હેઠળના પોડગાંવ નજીક કાંકેર લોકસભા મતવિસ્તારના સાંસદ ભોજરાજ નાગના કાફલાના વાહન સાથે મોટરસાઇકલ અથડાતાં મોટરસાઇકલ સવાર ખુમેશ્વર સમર્થ, તમેશ્વર દેહરી અને ગિરધારીનું મૃત્યુ થયું હતું.
અધિકારીએ જણાવ્યું કે સોમવારે રાત્રે, જ્યારે સાંસદ નાગ ભાનુ પ્રતાપપુરથી અંતાગઢ સ્થિત તેમના ઘરે જઈ રહ્યા હતા, ત્યારે એક મોટરસાઇકલ કાફલાના વાહન સાથે અથડાઈ ગઈ હતી. તેમણે જણાવ્યું કે મોટરસાયકલ સવારો પોંડગાંવથી પટેલપારા જઈ રહ્યા હતા. તેમણે કહ્યું કે અકસ્માતમાં ત્રણેય મોટરસાયકલ સવાર ગંભીર રીતે ઘાયલ થયા છે. કાફલામાં રહેલા પોલીસ કર્મચારીઓની મદદથી ઘાયલોને હોસ્પિટલ લઈ જવામાં આવ્યા, જ્યાં બે લોકોને મૃત જાહેર કરવામાં આવ્યા હતા. જ્યારે એક વ્યક્તિને વધુ સારી સારવાર માટે જિલ્લા હોસ્પિટલ કાંકેર મોકલવામાં આવ્યો હતો જ્યાં તેનું પણ સારવાર દરમિયાન મૃત્યુ થયું હતું.