વોશિંગ્ટન, 04 નવેમ્બર 2026: ડેમોક્રેટિક પાર્ટીના ઉમેદવાર ડૉ. એમી એક્ટને ઓહાયોના ગવર્નર પદની ચૂંટણી જીતી લીધી છે. તેમણે ટ્રમ્પનું સમર્થન ધરાવતા ભારતીય-અમેરિકન રિપબ્લિકન ઉમેદવાર વિવેક રામાસ્વામીને પરાજય આપ્યો છે.
ઓહાયોના ગવર્નર પદની ચૂંટણી જીતીને, એમી એક્ટન આ રાજ્યના સર્વોચ્ચ પદ પર ચૂંટાયેલાં પ્રથમ મહિલા બન્યાં છે. તેમની આ જીત સાથે, 20 વર્ષમાં પહેલીવાર કોઈ ડેમોક્રેટ ઉમેદવારે ગવર્નર પદની ચૂંટણી જીતી છે.
એમી એક્ટને વિવેક રામાસ્વામીને હરાવ્યા
અહેવાલો અનુસાર, રામાસ્વામી અને તેમના રિપબ્લિકન સાથીઓએ એમી એક્ટન સામેની ચૂંટણી જીતવાના પ્રયાસમાં 10 કરોડ ડોલરથી વધુ રકમ ખર્ચી હતી. તેમ છતાં, ઓહાયોના ગવર્નર તરીકે એમી એક્ટન ચૂંટાઈ આવ્યા હતા.
60 વર્ષીય એક્ટને ‘પરવડે તેવી આરોગ્યસેવા’ અને તેના સુધીની બહેતર પહોંચને પોતાના ચૂંટણી પ્રચારનો મુખ્ય આધાર બનાવ્યો. તેમણે પોતાના જીવનના અનુભવો રજૂ કરીને શ્રમજીવી અને મધ્યમ વર્ગના મતદારોને આકર્ષ્યા.
ઓહાયોના રહેવાસી એમી એક્ટને તેમના ચૂંટણી પ્રચાર દરમિયાન જણાવ્યું હતું કે તેમણે તેમના બાળપણનો અમુક સમય ઘર વિના વિતાવ્યો હતો. એક તબક્કે તો તેમણે આખી શિયાળાની ઋતુ દરમિયાન તંબુમાં પણ રહેવું પડ્યું હતું.
એમીની આ જીત એવા સમયે મળી છે જ્યારે ડેમોક્રેટ્સ ઓહાયોમાં ગુમાવેલો જમીની આધાર ફરી મેળવવાના પ્રયાસ કરી રહ્યા છે. ડોનાલ્ડ ટ્રમ્પના રાજકીય ઉદય દરમિયાન, અહીંના મતદારો વધુને વધુ રિપબ્લિકન પાર્ટી તરફ વળ્યા હતા.
વધુ વાંચો: હૈદરાબાદમાં 6.78 કરોડની નકલી નોટો ઝડપાઈ, ભાડાના મકાનમાં ચાલતું હતું નકલી નોટોનું કારખાનું
