- મંકીપોક્સને લઈને કડકાઈ
- વિદેશથી આવનારને દિલ્હી એરપોર્ટથી સીધા એલએનજેપી હોસ્પિટલ મોકલાશે
- દિલ્હીના લેફ્ટનન્ટ ગવર્નરની બેઠકમાં લેવાયો નિર્ણય
- કેન્દ્રની માર્ગદર્શિકાનું પાલન કરવા જણાવ્યું
દિલ્હી: કેરલ બાદ દિલ્હીમાં પણ મંકીપોક્સનો કેસ નોંધાયો છે.ત્યારે વિદેશથી દિલ્હી આવતા મુસાફરો કે જેમને મંકીપોક્સના ચેપના લક્ષણો હોય તેમને ઈન્દિરા ગાંધી ઈન્ટરનેશનલ એરપોર્ટ પરથી લોકનાયક જય પ્રકાશ નારાયણ (LNJP) હોસ્પિટલમાં મોકલવામાં આવશે.સૂત્રોએ જણાવ્યું કે,સોમવારે દિલ્હીના લેફ્ટનન્ટ ગવર્નર વીકે સક્સેનાની અધ્યક્ષતામાં મળેલી સમીક્ષા બેઠકમાં આ નિર્ણય લેવામાં આવ્યો છે.
તે જ સમયે, દિલ્હી સરકારે તમામ ડીએમ અને સંબંધિત અધિકારીઓને મંકીપોક્સ ચેપના સંચાલન પર કેન્દ્રની માર્ગદર્શિકાનું પાલન કરવા કહ્યું. માર્ગદર્શિકામાં કહેવામાં આવ્યું છે કે એરપોર્ટ અથવા પોર્ટ પરથી રેફરલ સિસ્ટમને મજબૂત કરવાની જરૂર છે.મંકીપોક્સના પગલે, સરકારે એરપોર્ટ અને બંદર આરોગ્ય અધિકારીઓ ઉપરાંત આરોગ્ય અને પરિવાર કલ્યાણ વિભાગના પ્રાદેશિક નિર્દેશકોને તમામ આંતરરાષ્ટ્રીય પ્રવાસીઓની કડક આરોગ્ય તપાસ કરવા માટે નિર્દેશ આપ્યો છે.
સૂત્રોએ જણાવ્યું કે, તાવ, કમર અને સાંધામાં દુખાવો જેવા લક્ષણો ધરાવતા મુસાફરોને દિલ્હી એરપોર્ટથી એલએનજેપી હોસ્પિટલના આઇસોલેશન વોર્ડમાં મોકલવામાં આવશે. આવા દર્દીઓની દેખરેખ માટે 20 લોકોની વિશેષ ટીમ પણ તૈયાર કરવામાં આવી છે.
સૂત્રોના જણાવ્યા અનુસાર, મંકીપોક્સના લક્ષણો મળવા પર શંકાસ્પદ દર્દીઓના સેમ્પલ નેશનલ ઈન્સ્ટિટ્યૂટ ઓફ વાયરોલોજી, પુણેમાં મોકલવામાં આવશે. તે જ સમયે, જિલ્લા વહીવટીતંત્ર દર્દીના પરિવારના સભ્યોને ક્વોરેન્ટાઇન કરશે અને આવા શંકાસ્પદ દર્દીઓના સંપર્કને શોધી કાઢશે.
