ઉત્તરાખંડમાં લાખોના અભિપ્રાયના આધારે યુનિફોર્મ સિવિલ કોડનો ડ્રાફ્ટ તૈયાર કરાયોઃ પુષ્કર ધામી
નવી દિલ્હીઃ વડાપ્રધાન નરેન્દ્ર મોદીની ટીપ્પણી બાદ દેશભરમાં ‘યુનિફોર્મ સિવિલ કોડ’ના મુદ્દે ચર્ચા શરૂ થઈ ગઈ છે. મુસ્લિમ સમુદાયના ઘણા મોટા નેતાઓ ખુલ્લેઆમ તેનો વિરોધ કરવા આગળ આવ્યા છે. દરમિયાન આમ આદમી પાર્ટી જેવા ઘણા રાજકીય પક્ષો આ મુદ્દે મોદી સરકાર સાથે જોવા મળી રહ્યા છે. દરમિયાન, ઉત્તરાખંડના મુખ્ય પ્રધાન પુષ્કર સિંહ ધામીએ કહ્યું કે, સમાન નાગરિક સંહિતાના મુસદ્દા માટે રચાયેલી સમિતિએ તેનું કામ પૂર્ણ કરી લીધું છે, અને તે ટૂંક સમયમાં રાજ્યમાં લાગુ કરવામાં આવશે.
મુખ્યમંત્રીએ કહ્યું કે, અમે 12 ફેબ્રુઆરી, 2022 (વિધાનસભા ચૂંટણી પ્રચારના છેલ્લા દિવસે)ના દિવસે વચન આપ્યું હતું કે જો અમે ફરીથી સત્તામાં આવીશું, તો અમે સમાન નાગરિક સંહિતા લાગુ કરીશું. સીએમ ધામીએ કહ્યું કે ઉત્તરાખંડના લોકોએ એક રાજકીય પક્ષને સતત બીજી વખત સરકાર બનાવવાની તક આપીને તેના પર પોતાની મહોર લગાવી દીધી. તેમણે કહ્યું, “આ માટે જનતાએ અમને જનાદેશ આપ્યો અને હવે અમે અમારું વચન પૂરું કરવા જઈ રહ્યા છીએ.”
રાજ્ય સરકારે સત્તામાં આવ્યા પછી તરત જ કાયદાનો મુસદ્દો તૈયાર કરવા માટે નિષ્ણાતોની એક સમિતિની રચના કરી હતી. મુખ્યમંત્રીએ કહ્યું કે, સમિતિએ આ સમયગાળા દરમિયાન બે લાખથી વધુ લોકોના સૂચનો અને મંતવ્યો લીધા હતા. તેમણે કહ્યું, “આ ડ્રાફ્ટ મળતાં જ અમે તેને દેવભૂમિ ઉત્તરાખંડમાં લાગુ કરીશું.” તેમણે આશા વ્યક્ત કરી કે દેશના અન્ય રાજ્યો પણ આ દિશામાં આગળ આવશે.
