રિયાધ, 6 ઓક્ટોબર 2026: સાઉદી અરેબિયા અને યમનના હૂથી બળવાખોરો વચ્ચે વધી રહેલા તણાવ અને સુરક્ષા વિષયક જોખમો વચ્ચે પાકિસ્તાન, સાઉદી અરેબિયા અને તુર્કીયે સૈન્ય દળોની ઝડપી તૈનાતી માટે જરૂરી પગલાં લેવા પર સંમતિ દર્શાવી છે. ‘મક્કા રક્ષા ગઠબંધન’ની વ્યૂહાત્મક, રાજકીય અને સંરક્ષણ સમિતિની રિયાધ ખાતે યોજાયેલી કટોકટીની બેઠકમાં આ મહત્વપૂર્ણ નિર્ણય લેવાયો હતો.
- સામૂહિક સુરક્ષા કરાર: એક દેશ પર હુમલો ત્રણેય પર હુમલો ગણાશે
ઓગસ્ટ મહિનામાં આ ત્રણેય દેશો વચ્ચે એક મહત્વપૂર્ણ સંરક્ષણ કરાર પર હસ્તાક્ષર કરવામાં આવ્યા હતા, જેમાં સામૂહિક સુરક્ષાની વ્યવસ્થા કરવામાં આવી છે. આ કરાર મુજબ, જો ત્રણેયમાંથી કોઈ પણ એક દેશ પર સશસ્ત્ર હુમલો થશે તો તેને ત્રણેય દેશો પર થયેલો હુમલો માનવામાં આવશે. બેઠક બાદ જાહેર કરાયેલા સંયુક્ત નિવેદન અનુસાર, સામૂહિક સંરક્ષણ પ્રત્યેની પ્રતિબદ્ધતાઓને તાત્કાલિક લાગુ કરવાનો અને સાઉદી અરેબિયામાં જરૂર પડ્યે સૈન્ય દળોની ઝડપી તૈનાતી સુનિશ્ચિત કરવાનો નિર્ણય લેવામાં આવ્યો છે. આ ઉચ્ચસ્તરીય બેઠકમાં પાકિસ્તાન તરફથી ઉપપ્રધાનમંત્રી ઈશાક દાર, સંરક્ષણ મંત્રી ખ્વાજા આસિફ અને સેના પ્રમુખ ફીલ્ડ માર્શલ આસિમ મુનીરે હાજરી આપી હતી.
- પાકિસ્તાન અને તુર્કીયેની સેના સહયોગી ભૂમિકામાં
પાકિસ્તાનના સંરક્ષણ મંત્રી ખ્વાજા આસિફે જણાવ્યું હતું કે, આ વિસ્તારમાં પાકિસ્તાન અને તુર્કીયેના સૈન્ય દળો હાજર છે, પરંતુ સીધા લડાયક અભિયાનોમાં માત્ર સાઉદી સેના જ સામેલ છે. હાલ પાકિસ્તાન અને તુર્કીયેના દળો સર્વેલન્સ (નિરીક્ષણ), માહિતી એકત્ર કરવા અને સહયોગી ભૂમિકા ભજવી રહ્યા છે. ‘મક્કા રક્ષા ગઠબંધન’ના ત્રણેય સભ્યોએ મક્કા અને મદીના જેવા પવિત્ર શહેરો તથા સાઉદી અરેબિયાના નાગરિક અને આર્થિક ઠેકાણાઓને નિશાન બનાવવાના પ્રયાસોની સખત શબ્દોમાં નિંદા કરી છે. સાથે જ, પાકિસ્તાન અને તુર્કીયે સાઉદી સશસ્ત્ર દળોની સજ્જતા અને વ્યાવસાયિક ક્ષમતાની પ્રશંસા કરી હતી.
