ઉદયપુર 18 જાન્યુઆરી 2025: ઉદયપુર જિલ્લાના સવિના પોલીસ સ્ટેશન વિસ્તારમાં સવારે 3 વાગ્યે થયેલા એક દુ:ખદ માર્ગ અકસ્માતમાં, જન્મદિવસની ઉજવણી શોકમાં ફેરવાઈ ગઈ. જૂના અમદાવાદ બાયપાસ પર નેલા તળાવ પાસે બે કાર વચ્ચે સામસામે ટક્કર થતાં ચાર મિત્રોના ઘટનાસ્થળે જ મોત થયા હતા, જ્યારે છ મિત્રો ગંભીર રીતે ઘાયલ થયા હતા.
ટક્કર એટલી ગંભીર હતી કે બંને કાર સંપૂર્ણપણે તૂટી ગઈ હતી, અને યુવાનો વાહનોની અંદર ફસાઈ ગયા હતા. પોલીસ અને સ્થાનિક રહેવાસીઓએ કટર અને ક્રેનનો ઉપયોગ કરીને દરવાજા તોડીને કાટમાળમાંથી મૃતદેહો અને ઘાયલોને બહાર કાઢ્યા હતા.
સવિના પોલીસ સ્ટેશનના અધિકારી અજરાજ સિંહે જણાવ્યું હતું કે કારમાં સવાર છ મિત્રો નજીકના નેલા તળાવ વિસ્તારમાં યોજાઈ રહેલા ‘મહેફિલ-એ-મિલાદ’ કાર્યક્રમમાં હાજરી આપવા આવ્યા હતા. મૃતક, મોહમ્મદ અયાનનો જન્મદિવસ 16 જાન્યુઆરીએ હતો.
કાર્યક્રમ પૂરો થયા પછી, બધા મિત્રો ચા પીવા માટે કારમાં બેસીને નીકળ્યા. સર્વિસ રોડથી બાયપાસ પર પહોંચતાની સાથે જ તેમની કાર ગુજરાત લાઇસન્સ પ્લેટવાળી બીજી કાર સાથે અથડાઈ ગઈ. બંને કારને ભારે નુકસાન થયું હતું. આ ટક્કરમાં એક જ કારમાં મુસાફરી કરી રહેલા એક જ પરિવારના ચાર સભ્યો ઘાયલ થયા હતા.
વધુ વાંચો: વૈષ્ણોદેવી સર્કલ પાસે ફોર્ચ્યુનર કાર ડિવાઈડ કૂદી ST બસ સાથે અથડાઈ, કારચાલકનું મોત
